A Real Federación Galega de Fútbol anuncia o inicio das diferentes ligas para os equipos de #ANOSACANTEIRA que aínda non están en competición oficial: Cadete A, Cadete B, Infantil A, Infantil B, Alevín A, Alevín B, Benxamín A e Benxamín B.
Segundo apunta o ente autonómico, o regreso aos terreos de xogo será "graduado, con moito sentidiño e cumprindo escrupulosamente todas as normativas sanitarias".
As datas que barallan os responsables federativos, a condición de que o permita a situación sanitaria, son as seguintes:
- División de Honra cadete, Liga Galega cadete e Liga Galega infantil: entre o 24 de xaneiro e a primeira semana de febreiro
- Primeira Autonómica infantil: segunda quincena de febreiro
- Competicións de fútbol 8, nas que participan os dous equipos alevíns e os dous benxamíns do Dépor: finais de febreiro
Os futbolistas de #ANOSACANTEIRA do Cadete A ao Benxamín B non terán que pasar test serológicos, antíxenos ou similares; pero por contra si será necesario o uso de máscara para os adestramentos e a competición.
A pesar de que non hai aínda competición, todos os equipos do fútbol base do Dépor realizan varias sesións de adestramento semanais na Cidade Deportiva de Abegondo desde o pasado agosto, mes no que arrancou a súa pretemporada por exemplo o Cadete A.
