O azar do calendario quixo que o Fabril, esta tempada, medísese de maneira consecutiva na primeira volta fóra e na segunda en casa aos dous grandes favoritos ao título no grupo 1º de Segunda Federación.
Así, se o pasado domingo o filial tombaba en ABANCA-RIAZOR por 3-0 ao Pontevedra CF, este mediodía o filial non puido (0-2) co CD Numancia de Soria, un equipo con pegada e oficio que só cultivou unha derrota no que vai de liga.
Este resultado deixa ao filial con 30 puntos na zona media da táboa, co partido pendente no Estadio Vero Boquete de San Lázaro ante a SD Compostela.
Foron baixa os lesionados Luisao, Aarón e Kike Fernández; ademais de Noé, operado recentemente en Madrid.
O partido arrincou con presión alta do CD Numancia, que buscaba os 3 puntos no seu man a man co Pontevedra CF na cabeza da táboa.
"Custounos moito nestes primeiros minutos ter tranquilidade con balón. Eles apertáronnos moi arriba e non conseguimos ter continuidade", apuntou Manuel Pablo na rolda de prensa pospartido.
O CD Numancia chegaba a zonas de área fabrilista, "pero a partir do minuto 20 empezamos a ter balón. Empezámolos a afundir. Tivemos situacións próximas á área que non terminamos porque eles son moi sólidos", engadiu.
Así, Marotías, un central encargado de executar o balón parado polo seu bo golpe de balón, lanza unha falta a tres cuartos de campo á escuadra dereita de Kudakovskiy, que se viu obrigado a empregarse a fondo para enviar a córner.
Á media hora, Fabi plántase só ante Kudakovskiy pero entretense co balón e dálle tempo aos defensas para interceptar a xogada.
Pouco despois, Garrido rompe a liña de centro de campo e, xa na área, dispara cruzado á esquerda da portería numantina.
Sentía cómodo o Fabril tapando ben os espazos e saíndo á contra por velocidade.
"Era o partido máis igualado. Eles máis preto da súa portería", subliñou o preparador branquiazul.
Aos 37 minutos, o xuvenil Manu Ferreiro obriga de novo a intervir a Kudakovskiy cun duro disparo desde fóra da área.
"Aí chegou a falta e o balón parado, onde teñen moito rendemento. Púxosenos complicado", afirmou o adestrador canario.
No minuto 40 adiantouse o CD Numancia tras un saque dunha falta lateral. Bonilla lanza, o despexe da defensa fabrilista remátao Mendibe de acrobática chilena. Alberto saca con apuros e o balón cae a Dieste na frontal da área, que marca o primeiro da mañá.
Ao descanso chegouse cun cabezazo de Mendibe, a centro de saque de esquina de Bonilla que se marchou rozando a escuadra dereita de Alberto.
Tras o paso polos vestiarios saíu o Fabril a por o empate.
"Eles estaban máis afundidos pero é un equipo que traballa moi ben, que gaña moitos duelos e era moi difícil", recalcou Manuel Pablo.
Alfaro centra raso ao corazón da área entrando por banda dereita buscando rematador. Kudakovskiy atrapa con apuros.
O CD Numancia exhibiu de novo a súa pegada. Bonilla saca un corner por banda dereita, Moustapha cabecea e de novo Dieste, esta vez en boca de gol, empuxa a pracer.
Con todo, o encontro cambiou de rumbo no minuto 55 pola expulsión de David Sanz con vermella directa por entrada perigosa a Fabi cando este iniciaba unha contra.
Manuel Pablo move o banco: "Tentamos cargar a área cos cambios, con moitos centros. Por dentro estábanos custando xerar e non tivemos ese acerto para poder ter o resultado máis próximo".
Adrián Guerrero, o novo '7' fabrilista, releva a Manu Ferreiro; e Bil, a Pablo García.
Pouco despois, o técnico insistiu coa altura de Darío Germil na área polo dinamismo de Kevin Sánchez, hoxe sen menos espazos e ademais con problemas musculares.
Co paso dos minutos incrementouse o asedio fabrilista sobre a portería do CD Numancia. O meta Kudakovskiy foi o protagonista ao atallar con seguridade numerosos balóns aéreos a centros desde as dúas bandas.
A 10 minutos para o final, Bil non precisou o seu disparo na área pequena a centro de Guerrero. O balón foise demasiado alto.
Soubo o cadro castelán ir deixando pasar os minutos a base de romper o ritmo de xogo fabrilista, axudado ademais polo seu poderío físico.
A gran ocasión para meterse no partido volveu ter Fabi, que cabeceou un mal despexe de Kudakovskiy. Salvou Bonilla baixo paus en posición acrobática e coa axuda do traveseiro. Faltaban case 10 minutos para o final e supuxese ese tanto meterse no partido.
Non foi así e ao final os 3 puntos marcháronse a Soria.
A próxima fin de semana, a Fabril visita á UP Langreo.
Fabril: Alberto, Pablo García (Bil, min. 57), Damián Canedo, Marotías, Íker Vidal (Mane, min. 77), Jaime Garrido (Carreira, min. 77), Alfaro, Mardones, Manu Ferreiro (Guerrero, min. 57), Fabi e Kevin Sánchez (Darío Germil, min. 66)
CD Numancia: Kudakovskiy, Bonilla, Moustapha, Sanchidrián, Alain Ribeiro (Carlos González, min. 67), David Sanz, Góngora (Jony, min. 67), C. Dieste (Marc Fuentes, min. 67), Grande, Danese e Mendibe
Árbitro: Da Mata Martínez, do comité madrileño. Amoestou a Moustapha (min. 19), Damián Canedo (min. 40), Mardones (min. 53), Guerrero (min. 73), Fabi (min. 77), Alfaro (min. 87), Mane (90+2). Expulsou vermella directa a David Sanz (min. 55).
Goles: 0-1 Dieste (min. 40); 0-2 Dieste (min. 52)
Incidencias: Partido correspondente á 22ª xornada no grupo 1º de Segunda Federación disputado en Abegondo. O Fabril luciu brazaletes negros e gardouse un minuto de silencio polo falecemento onte sábado de Ceferino Fonticoba 'Fino', utilero do equipo desde 1989 a 2019.
