A segunda edición do DéporCampus de Xenebra (Suíza), arrancou esta mañá con máis de medio centenar de nenos participantes.
O Stade de Bernex, a 8 quilómetros do centro da área metropolitana máis habitada de Suíza, acolle desde hoxe, por segundo ano consecutivo, o DéporCampus de Xenebra, un dos once DéporCampus Cabreiroá 2017 e o único que se realiza fóra de Galicia.
Os sesenta inscritos gozarán durante toda a semana dunha actividade dirixida polos técnicos do Club co obxectivo de transmitir habilidades e conceptos futbolísticos, ademais dos valores que representa o Dépor: respecto, solidariedade, amizade, xogo limpo, integración, esforzo e felicidade.
Con 9 quendas aínda abertas á inscrición (a terceirao, cuarta e quinta de Abegondo, a segunda de Bertamiráns e os de Viveiro, Rianxo, As Pontes, Ordes e Monforte), xa se superaron os 1.300 inscritos. Deste xeito, está a piques de alcanzarse o número de participantes na edición 2016 (foron 1.548 nenos e nenas, deles 1.068 en Abegondo). Este ano, a sede central na Cidade Deportiva do RC Deportivo pasa de 3 a 5 semanas de actividade (a última de xuño e todo xullo), polo que a previsión é superar os 2.000 participantes.
Os DéporCampus Cabreiroá estrean este ano 4 sedes: As Pontes, Santiago, Ordes e Zas, que se suman ás xa existentes en Abegondo, Viveiro, Rianxo, Bertamiráns, Ferrol, Monforte e Xenebra (Suíza).
Máis aló das actividades, o equipamento deportivo (composto de camiseta, pantalón e medias), a froita e o zume diarios, o diploma final, a visita dun dos xogadores do primeiro cadro deportivista (sempre dentro das posibilidades do calendario do equipo) e un sorteo final de agasallos, son outros dos atractivos dos DéporCampus Cabreiroá, que teñen un horario de mañá de 10:00 a 14:00 horas.
En todos os casos, os accionistas e socios do RC Deportivo gozan dun desconto, igual que as familias con máis dun membro en paro ou as que inscriban máis dun fillo, ademais das que cada Club coorganizador determine en cada caso.
Desde esta edición 2017, toda a xestión dos DéporCampus Cabreiroá realízase a través da nova páxina da actividade: deporcampus.rcdeportivo.es/gl. Nela pódese atopar toda a información común a todos os DéporCampus Cabreiroá e específica de cada unha das sedes.
