A Cidade Deportiva de Abegondo acolleu, de mans do presidente do RC Deportivo, Antonio Couceiro, a recepción de redes do proxecto Redes Vivas de ABANCA.
Redes Vivas é un proxecto iniciado por ABANCA en xuño de 2021 dentro da liña de acción ambiental do seu plan de Sustentabilidade. Ten como obxectivo recuperar redes de pesca que se atopan abandonadas en espazos costeiros para darlles un novo uso como material deportivo.
O proxecto impacta positivamente en tres liñas estratéxicas do banco: sustentabilidade, xa que contribúe ao coidado do medio ambiente e fomenta a economía circular; promoción da economía local e os sectores produtivos, achegando innovación e visibilidade a un oficio tradicional e artesán realizado maioritariamente por mulleres, e apoio ao deporte, dotando de material aos clubs galegos.
Desde que se iniciou o proxecto recuperáronse 1.938 quilos de aparellos das zonas de costa de Galicia, que se transformaron en 2.076 m2 de material reciclado para o seu uso en catro disciplinas deportivas das 34 que patrocina o banco a través do seu programa ABANCA Deporte Base: fútbol, balonmán, fútbol sala e kaiak polo.
No segundo semestre de 2021 entregáronse 21 xogos de redes (42 porterías) a 21 equipos e este ano está previsto que se entreguen 33 novos xogos de redes (66 porterías), entre elas as que hoxe recepcionou o RC Deportivo. Neste caso, amplíase o alcance do programa e irán destinadas tanto a clubs de deporte basee como a outros equipos profesionais patrocinados polo banco. En total, cando finalice o ano, o proxecto Redes Vivas conseguiría renovar 108 porterías e sumará máis de 6.000 deportistas beneficiados.
