Medio centenar de alumnos do CEIP Concepción Arenal visitaron a Cidade Deportiva de Abegondo este xoves 25 de xaneiro nunha nova xornada do proxecto 'Os Nosos Valores-Escolas 110 % Branquiazuis'. Os estudantes do centro educativo de Catro Camiños compartiron boa parte da mañá con Cristina Oreiro e Pedro Mosquera, futbolistas do Dépor ABANCA e o primeiro equipo, despois de seguir desde o terreo de xogo o adestramento do conxunto dirixido por Cristóbal Parralo.
Antes do encontro con Cris e Mosquera, como vén sendo habitual os mozos recibiron unha charla acerca da historia do Dépor a cargo do xornalista de La Opinión de A Coruña Carlos Miranda, autor do libro '110 % Branquiazul'. A xornada acabou coa entrega de postais asinadas por ambos os futbolistas e coa foto de familia na bancada do campo principal de Abegondo.
A experiencia deportivista dos alumnos do CEIP Concepción Arenal aínda non terminou, xa que vivirán en ABANCA-RIAZOR o próximo partido ligueiro do Dépor, fronte ao Levante, mañá sábado 27 de xaneiro.
