O Deportivo achegará dous futbolistas á selección española sub-16, que participa este mes de xaneiro na Copa Aegean na cidade turca de Esmirna.
Ambos pertencen ao cadro do Cadete A da División de Honra:
Álvaro Pérez Campo 'Trilli' (Ortigueira, A Coruña, 19 de maio de 2003) xoga como lateral dereito. Cumpre a súa quinta campaña na estrutura branquiazul.
Hugo Novoa Ramos (Bertamiráns-Ames, 24 de xaneiro de 2003) actúa de extremo. Novoa está na súa sexta temporada nas filas deportivistas.
Os dous xa son habituais nas últimas concentracións do citado equipo nacional para os adestramentos na Cidade do Fútbol de Las Rozas.
Só Atlético de Madrid e Real Madrid CF achegan máis futbolistas que o Dépor, con 4 o primeiro; e 5 o segundo.
Os branquiazuis están ao mesmo nivel que o RC Celta e Valencia CF, con 2 xogadores; e por diante de clubs da talla do Athletic Club, Villarreal CF ou Sevilla CF, entre outros, cun futbolista seleccionado.
A selección concéntrase o sábado 12 de xaneiro e viaxa este domingo 13 a Esmirna.
España quedou encadrada no grupo B, con Rusia, Albania e Macedonia.
O calendario de partidos da selección, todos nas instalacións de Altinordu FK Meti Oktay Tesisleri, é o seguinte:
Primeira Fase
Luns 14 de xaneiro
12:00: ESPAÑA - ALBANIA
Martes 15 de xaneiro
12:00: ESPAÑA - MACEDONIA
Xoves 17 de xaneiro
12:00: ESPAÑA - RUSIA
O primeiro de grupo xogará a final, contra o primeiro do grupo A, no que están Turquía, Inglaterra, Moldavia e Azerbaiján. Será o sábado 19 de xaneiro ás 15:00 horas.
Os segundos de grupo xogarán polo terceiro e cuarto posto, ese mesmo sábado 19 ás 12:00 horas.
Presenza habitual esta temporada en Las Rozas
Esta campaña, ademais de Trilli e Hugo Novoa foron citados os seguintes canteiráns deportivistas:
-Mujaid (central do Fabril): Xogos do Mediterráneo coa sub-19
-Juan Rodríguez Lima (central do Xuvenil B) e Íker Piedra Blanco (porteiro do Xuvenil B): Adestramentos coa sub-17
-Sergio Bernárdez (mediocentro cedido no San Tirso SD cadete): Torneo Sportchain AGS Cup coa sub-15
Por conseguinte, a factoría de Abegondo aos poucos vaise convertendo nun referente para os diferentes seleccionadores nacionais.
