Antonio Hidalgo manifestou na sala de prensa do Dépor Training Center que "a nivel numérico estamos a facer un bo traballo. Evidentemente sempre queremos máis, queremos mellorar. Esa é a nosa pretensión". "A cantidade de puntos é importante e dános o dereito de estar na posición que estamos pero hai que seguir facendo moito máis, sumar de 3 outra vez. Vimos de 2 derrotas. Por iso a alegría do outro día está moi ben, a todo o mundo veunos ben pero hai que seguir sumando de 3", engadiu.
Subliña que "temos que seguir empuxando, moi humildes porque todo está moi igualado".
O técnico deportivista explica que todo o ve "en global coas 18 xornadas que van. É importante a perspectiva, non quedar só co último sexa para bo ou para malo".
Do partido no Nou Estadi Encamp de Andorra este sábado 20 de decembro ás 14:00 (LaLiga TV Hypermotion) advirte que "imos a un sitio difícil. Temos que competir ao mil por mil, buscar os nosos momentos de poder ir á presión, saber cando non. Saber xestionar o noso balón, facerlles dano, pasar o máximo tempo en campo rival".
Despois dos seus primeiros meses na Coruña, confesa estar "encantado na cidade. Paréceme un sitio espectacular".
Iso si, apunta que "se onde estou. Aos poucos funme dando conta do que rodea ao Club".
