Ao Dépor escápaselle o derbi na segunda parte

O Dépor e o Lugo saltaron ao campo no mellor escenario posible, un estadio cheo, nunha tarde de sol e coas afeccións pondo o colofón a unha xornada de festa inesquecible polas rúas da capital lucense. 

 

Para a actuación de hoxe o técnico deportivista, Fernando Vázquez, tan só cambiou a un actor protagonista con respecto ao equipo das dúas últimas semanas: Juan Carlos deixou o seu sitio no once a Álex Bergantiños que regresaba á titularidade tras varias semanas fóra por problemas físicos.

 

No primeiro tempo os branquiazuis tiveron o partido controlado en todo momento, sen ceder ocasións e practicamente posesión ante un Lugo que non renunciou ao seu principio futbolísticos de tocar o balón con moita calidade. 

 

A primeira ocasión para o Dépor chegou no primeiro minuto cun córner longo ao segundo pau, que rematou Lopo e sacou a defensa branquivermella sobre a liña de gol. Foi unha mostra de intencións xa que só houbo que esperar oito minutos máis para ver o primeiro tanto do partido. Foi tras unha gran xogada persoal de Rabello no centro do campo que, rodado de rivais, consegue habilitar a Diego Ifrán. O uruguaio encarou con potencia e ao chegar á frontal da área disparou cruzado con perna esquerda, lonxe do alcance de Dani Mallo, para conseguir abrir o marcador.

 

De novo un córner, este en o 24, a punto estivo de supor un novo tanto para o Dépor. O saque de Luisinho superou ao porteiro dos lucenses para que un defensa sacáseo baixo paus cando se coaba xa na portaría.

 

O Lugo apenas inquietou a Lux. Dúas chegadas consecutivas a balón parado foron as únicas aproximacións dos lucenses na primeira parte. A falta que lle custou a amarela a Laure provocou o primeiro córner sobre a portaría deportivista no minuto 30, xusto antes de que Carlos Pita lanzase unha falta que, entre Poroto e o traveseiro, acabou fóra.

 

Lopo, moi activo en ataque, volveu ter unha boa ocasión nunha media chilena na área pequena que se marchou alta. Foi a antesala do segundo gol do Dépor. No 41 Luisinho recibiu en curto un saque de córner e disparou con contundencia para que Dani Mallo rexeitase de novo a saque de esquina. Este novo córner si que acabou no fondo da rede tras o remate de Insua, tocando a contrapié do porteiro e anotando o seu terceiro gol da tempada.

 

A pesar da vantaxe no descanso, o Dépor non renunciou ao ataque na continuación e a posesión e as chegadas no dez primeiros minutos foron case totais para os branquiazuis, hoxe xogando de gris. Todo cambiou ao producirse unha gran ocasión para os lucenses no 54, nun disparo seco desde a frontal abaixo, que sacou Lux a córner. Tras esa oportunidade chegaron os mellores minutos do CD Lugo, con chegadas ben atalladas inicialmente pola defensa e o porteiro, mentres o Dépor tentábao á contra pero sen xerar ocasións claras. Desde ese momento o dominio dos locais foi crecendo ata converterse case nun monólogo.

 

Espectacular foi a parada de Lux no 68 a remate de socato de Rennella que a bancada do Anxo Carro celebraba xa como gol. Pero a segunda consecutiva, tres minutos despois, Rennella non a perdoou, tras un gran centro do exdeportivista Pablo Álvarez e un remate de cabeza do franco-italiano que despois de pegar no traveseiro coouse na portaría de Lux.

 

As ocasións incesantes volvéronas a materializar os locais no 85 cun balón colgado de falta que cae morto na frontal da área pequena e que Rnenella caza ao voo aproveitando o encontrón entre Lux e Juan Domínguez. Esa xogada provocou unha gran brecha na cabeza ao dez coruñés.

 

A última oportunidade para desfacer as táboas volveuna a ter o Lugo, de novo por mediación de Rennella, que á media volta e desde a frontal da área, a punto estivo de sorprender a Lux.

 

O empate final no marcador foi o fiel reflexo do que sucedeu no campo lucense, unha parte para cada equipo e un resultado que non contentou do todo a dúas afeccións exemplares no día de hoxe.

 

CD Lugo:  Dani Mallo, Victor Díaz, Pavón, V. Marco, Manu, Pita, Seoane, Pablo Sánchez (Pablo Álvarez, min. 66), Álvaro Pena, Iago Díaz (Ernesto, min. 88) e Rennella.

 

RC Deportivo: Lux, Laure (Manuel Pablo, min 79), Lopo, Insua, Seoane, Alex Bergantiños, Juan Domínguez, Sissoko (Borja, min. 89), Rabello, Luisinho e Ifrán (Marchena, min. 75).

 

Árbitro: De Burgos Bengoetxea (C. Vasco) Amoestou a Laure (min. 28),  Pena (min. 75)

Goles: 0-1 Ifrán (min. 9); 0-2 Insua (min. 41); 1-2 Rennella (min. 71); 2-2 Rennella (min. 84)

Incidencias: Estadio Anxo Carro. Cheo, coa presenza de máis de 4.000 deportivistas nas bancadas.