Un grupo de adestradores procedentes de Polonia realizou recentemente unha visita ás instalacións do RC Deportivo co obxectivo de coñecer de primeira man a metodoloxía de traballo do club branquiazul.
Os técnicos puideron observar distintas sesións de adestramento dos equipos de ANOSACANTEIRA no Dépor Training Center, intercambiar impresións cos profesionais do Club e profundar en aspectos crave como a formación de xogadores, a planificación deportiva e a estrutura da canteira.
A visita enmárcase dentro dun programa de intercambio e aprendizaxe, orientado a compartir experiencias e boas prácticas no desenvolvemento do fútbol formativo e profesional.
Ademais do Dépor Training Center, os profesionais procedentes de Polonia visitaron o estadio ABANCA-RIAZOR e puideron seguir o partido de liga do Dépor ante a Real Sociedad B.
Desde o RC Deportivo valorouse moi positivamente este tipo de encontros, que reforzan a proxección internacional do club e fomentan o intercambio de coñecemento entre profesionais do fútbol europeo.
