Borja chega con 'ilusión', xa que o seu pai é fundador da Pena Deportivista de Ourense

O futbolista galego, que xa xogou en Riazor por exemplo como futbolista do Valladolid e da Selección Galega, é un vello soño do Deportivo, club que xa tentou fichalo na súa etapa infantil no Pavillón de Ourense. Ademais, ten xene branquiazul na familia, posto que o seu pai, que acompañou ao seu fillo na presentación da Praia Club, é un dos fundadores da Pena Deportivista de Ourense.

Foi operado Borja a finais da pasada tempada dunha tenotomía percutánea de ambos os adductores medios. Esta tarde foi avaliado polos Servizos Médicos do Deportivo para establecer a fase final da súa readaptación ao fútbol de alta competición. "Espero estar a adestrar nunha ou dúas semanas co grupo", apunta Borja. "É unha lesión comparable a unha rotura de fibras. Hai que esperar que se recupere e listo. Está en perfectas condicións para xogar ao fútbol", manifestou neste sentido Lendoiro.