Deportivo 2- Juventus 0<br>Volve o Deportivo das grandes noites europeas
Gran partido do Deportivo en Riazor. Un encontro no que os de Irureta fixérono todo: dominar, xogar, dar espectáculo e marcar en dúas ocasións. Tristán e Djalminha asinaron os goles nunha noite na que a afección gozou co xogo despregado e sobre todo co re
Nun comezo de partido moi vibrante do Deportivo, os branquiazuis adiantáronse cun golazo de Diego Tristán tras rematar de cabeza desde o punto de penalti un centro de Valerón no minuto 8 da primeira parte. Antes o Deportivo xa avisara co xogo despregado por Valerón, Fran, Víctor e Tristán.
Tras o gol a Juve pareceu vir arriba, pero enseguida o Deportivo recuperou o dominio e o bo xogo. Rápidos contraataques, xogadas elaboradas desde a defensa, paredes e sobre todo moito ritmo. Os branquiazuis puideron adiantarse de novo nun remate de cabeza de César a saída dun córner ou nunha increible xogada rematada por Valerón, ou nun impresionante disparo de Sergio pero alcanzouse o descanso co marcador dun a cero.
Na continuación os deportivistas non renunciaron a nada, nin ao xogo nin ao espectáculo, ante unha Juventus con poucas ideas. Os poucos intentos dos italianos de achegarse á meta de Molina eran atallados con acerto pola defensa deportivista e os de Irureta seguían buscando a porta defendida por Buffon. Tristán volveu pór en xaque á defensa visitante nun par de ocasións e aínda que os cambios introducidos no descanso polos de Lippi impedían os ataques polas bandas do Deportivo, as ocasións non deixaron de sucederse. O xogo de Valerón, Fran ou Tristán así como o acerto de Naybet atallando un par de ataques rivais deixaban á vecchia signora italiana sen recursos.
No 73 Davids é expulsado por protestar. Xusto despois, o segundo do Depor. Centro de Sergio desde a dereita que remata dun perfecto cabezazo Djalminha ao fondo das mallas. Era o broche perfecto para un gran partido.
No dez últimos minutos os turineses tentaron recortar distancias, sobre todo Trezeguet, pero a falta de acerto facía aumentar o seu nerviosismo por momentos polo que incorreron en moitas faltas e en protestas ao colexiado. Sergio tivo o último intento deportivista nas súas botas antes de que o colexiado decretase o final do encontro en Riazor.
A vitoria deportivista así como a do Arsenal por 4 a 1 ante o Bayer comeza xa a marcar diferenzas no Grupo D que ata esta xornada tiña a todos os integrantes igualados a puntos. O Deportivo ten que recibir en casa aínda ao Bayer e visitar ao Arsenal en Londres.
Polo Deportivo saíron de inicio: Molina, Romeu, Naybet, César, Mauro Silva, Tristán, Fran, Scaloni, Sergio, Víctor e Valerón. Os suplentes branquiazuis: Nuno, Makaay, Djalminha, Capdevila, Pandiani, Duscher e Héctor.
A Juve formou pola súa banda con Buffon, Ferrara, Montero, Pessotto, Do Piero, Nedved, Iuliano, Birindelli, Maresca, Trezeguet e Tachinardi. Os suplentes son Carini, Conte, Zenoni, Zambrotta, Thuram, Zalayeta e Davids.
O partido foi dirixido polo sueco Ander Frisk. Antes do comezo, gardouse un minuto de silencio en memoria da recentemente falecida nai de Manuel Pablo.
