O equipo é agora oitavo na clasificación con 42 puntos. A pesar da mala serie de resultados, a Europa League está a tres puntos de distancia que son os 45 que ten o Athletic Club, sexto. Lotina, en rolda de prensa tras o partido, manifestou que non quere nin oir a palabra Europa: "Primeiro temos que mellorar nós. Logo, xa veremos. Quedan oito partidos e moitos puntos en xogo". O domingo 11 de abril ao cinco da tarde visita Riazor o Real Racing Club.
O partido empezou con susto para os dous porteiros. Adrián envía un balón lixeiramente desviado tras unha boa acción individual. No outro campo, Agüero recibe entre os centrais do Deportivo, regatea a Aranzubía e déixase caer. Pérez Lasa, ben situado, aprecia o engano e manda seguir a xogada. Iso si, o colexiado vasco non amoestou ao dianteiro arxentino.
O Atlético, que vive o seu momento máis doce da tempada tanto de xogo como de resultados, apertou en busca do primeiro gol, que logrou ao vinte minutos grazas a Juanito, un futbolista que apenas contara para Quique. O central andaluz remata un centro de cabeza desde a dereita ao que responde Aranzubía cunha gran parada. Tras o rexeite, o balón vólvelle a caer a Juanito que desde o chan e a menos de medio metro da raia de gol desvía o xusto para que a meta vasco non poida chegar (1-0).
Co gol madrileño foi o Deportivo o que tratou de reaccionar. Fíxose dono da pelota, moveu ben o coiro dun lado a outro e o Atlético se replegó confiando no seu poderosísimo contragolpe, ben neutralizado nestes momentos polos de Lotina. Á media hora, Adrián recibe de novo un pase longo e márchase por velocidade dos dous centrais locais. Finalmente o balón quédaselle atrás cando encaraba xa a De Gea. Dous minutos máis tarde, no 32, Colotto cabecea lixeiramente desviado unha falta lanzada por Sergio desde a banda dereita. A catro minutos para o descanso, foi Adrián o que cabeceou fóra por moi pouco un bo servizo de Valerón, titular hoxe no Calderón, un estadio que foi a súa casa durante unha tempada.
Coa sensación de que o Deportivo podía conseguir a igualada chegouse ao descanso.
O partido rompeu no tramo inicial da continuación. No minuto 56 chega o 2-0 que foi o principio do fin para o Dépor. Tras un despexe en falso de Aranzubía, o balón chégalle a Agüero, que volve desaproveitar un man a man ante Aranzubía. Simao faise co rexeite e xuta con moita intención. De novo Aranzubía responde cunha gran parada. O terceiro rexeite cae a Forlán, quen, totalmente libre de marca, bate por segunda vez a meta deportivista. Lotina queixouse na sala de prensa de que o equipo estivo esta noite "moi blandito. Non podemos deixarlles rematar en tres ocasiones". De novo o Deportivo márchase do terreo de xogo sen recibir unha sóla cartolina amarela e con cinco faltas cometidas a falta de quince minutos para a conclusión, no que o marcador xa estaba sentenciado. "Somos un equipo moi limpo pero non podemos confundir con perdida de intensidade", explicou Lotina tras o choque.
A partir deste segundo gol viñeron os mellores momentos do Atlético. No minuto 57, de novo Agüero volve desaproveitar un un contra un ante Aranzubía. Un minuto máis tarde, Tiago, tras unha xogada individual no que burla a toda a defensa deportivista, se interna na área e o seu centro despéxao Colotto a saque de esquina cando se cantaba o gol desde a bancada.
Lotina trata de responder o banco coa entrada de Riki por Valerón. Pero todo foi inútil porque no minuto 60, Ujfalusi, un central reconvertido a lateral dereito, fai unha gran parede, penetra na área ata a raia de fondo e o seu pase da morte é rematado a pracer por Tiago no terceiro da noite, sen oposicion algunha. Fin do partido.
As únicas oportunidades do Deportivo para maquillar o resultado foron un bo lanzamento de falta de Iván Pérez ao que respondeu De Gea cunha espectacular parada e, antes, unha veloz galopada de Riki cuxo centro non chega a Adrián en boca de gol, desviado en última instancia pola defensa local.
Final do partido, severo correctivo no Vicente Calderón (3-0), un campo no que o Dépor non gaña desde fai xa dez anos e o equipo, con catro derrotas consecutivas, ten que apertar os dentes agora para volver levantarse. "Falaremos máis profundamente cos xogadores esta semana", declarou Lotina ante os medios de comunicación.
Atlético de Madrid: De Gea; Ujfalusi, Juanito, Dominguez, Antonio Lopez, Camacho, Tiago, Simao (m 85, Muíño), Xurado, Forlan (m. 63, Ibra) e Agüero (m. 68, Salvio).
Deportivo: Aranzubia, Manuel Pablo, Lopo, Colotto, Laure, Sergio (m. 82, Raúl), Antonio Tomas, Juan Rodriguez, Gardado, Valeron (m. 55, Riki) e Adrian (m. 66, Ivan Perez).
Arbitro: Perez Lasa, do Colexio Vasco.
Goles: 1-0, m. 21: Juanito; 2-0, m. 56: Forlan; 3-0, m. 60: Tiago.
Incidencias: La Peña Centenariazo, inaugurada oficialmente onte en Madrid, animo ao equipo desde a bancada do Vicente Calderón.
