Fran Alonso, acompañado de Kevin Cabado, compareceu na sala de prensa do Dépor Training Center unha vez confirmada a súa saída do Dépor ABANCA o 30 de xuño.
Sentado á dereita do técnico madrileño, o responsable do Dépor ABANCA afirmou que "conseguimos cousas importantes xuntos. Temos que estar moi agradecidos ao seu traballo durante este tempo aquí".
Apunta que "a nivel deportivo conseguimos estabilizar o equipo na máxima categoría. Por primeira vez estamos 3 temporadas consecutivas en Liga F. O ano pasado conseguimos remontar unha situación complicada, salvarnos a falta de 1 xornada. Este ano demos un paso máis e a falta de 6 partidos a permanencia xa era matemática".
Máis aló, "sacamos o potencial das xogadoras. Son 11 internacionais as que tivemos. Iso marcou os pasos de cara ao futuro".
E finalmente, afirma Kevin Cabado, "unha pata importante do proxecto é a canteira e fortaleceuse máis que nunca. Máis de 3.000 minutos de canteirás na temporada actual en Liga F. Record absoluto".
Pola súa banda, Fran Alonso ten "palabras de agradecemento para a directiva, e para Kevin e Aitor. Na miña carreira tiven moitísima sorte. Estiven en grupos incribles de persoas pero a aventura en Estados Unidos non foi como esperaba. Cheguei a odiar o fútbol. Déronme a oportunidade de vir nun proxecto difícil, que estaba nese momento en descenso; pero confiaron en min, coñecín a este grupo fantástico de xogadoras e staff e fixéronme volver amar o fútbol".
Por conseguinte, confesa que "o meu agradecemento será para sempre. O meu compromiso era o primeiro ano salvar ao equipo e o segundo ano asentarnos. A situación é moito mellor. O club xa pode afrontar fichaxes para a temporada que vén sabendo que estaremos en Liga F. Voume triste por unha banda porque fixen deste grupo a miña familia. Vin só e voume deixando aquí á familia. Pero voume con orgullo, sabendo que os obxectivos os cumprimos. Aínda quedan 5 partidos para subir esa nota: dun ben ou un notable escalar a un sobresaliente". "Vin sen ser un fan do Dépor e voume definitivamente sendo un fan do Depor", concluíu.
Fran Alonso ve ao RC Deportivo como "un club ambicioso. ANOSAFORZA é moi apaixonada. Está moi arraigada á cultura de aquí, ao Club pero é esixente. Esa esixencia, unha vez que nos vestimos o escudo, é parte do noso ADN".
Insiste en que "teño contrato até o 30 de xuño e débome 100% ao Dépor ABANCA. Quero facelo o mellor posible".
O adestrador deportivista confesa que "o club vai estar sempre no meu corazón e que menos que dar o 120%".
Subliña que "agora mesmo o Fabril ascendeu. O Dépor ABANCA B está a un pequeno paso de manter a categoría. Son recentemente ascendidas e van salvar a categoría. Están moi cerquiña. O masculino estamos recendo para que logren ese ascenso directo. Agora mesmo están nunha boa posición. O Dépor ABANCA logrou a salvación matemática a falta de 5 partidos. Iso define o proxecto".
Conclúe que "temos unha presidencia que aposta moitísimo polo Club. Hai pouco estivemos na presentación do Dépor Training Center. O futuro é moi brillante. Non teño ningunha dúbida que o Dépor ABANCA vai seguir crecendo, que o ano que vén non só van asentarse en Liga F senón que van loitar por obxectivos maiores. Eu que estou dentro vexo un futuro moi brillante para todas as seccións do RC Deportivo".
