Ian Mackay Abad (A Coruña, 14 de xullo de 1986) cumpriu un dos seus soños esta mañá ao ser presentado en Abegondo como novo xogador do RC Deportivo para as dúas próximas temporadas. "Estou moi contento. Tiña moitas ganas de volver vestir esta camiseta e defender este escudo", apuntou ante os medios informativos.
É máis, desvela que tiña "cousas de Segunda División. Tiven a sorte de facer un bo ano (no CE Sabadell) aínda que o obxectivo grupal non se conseguiu. En canto chamoume o Dépor, Juan (Giménez) púxose en contacto co meu representante, non tiven dúbida. Tiven pelexa co meu representante, non imos mentir. Dicíame que me gañei xogar en superior categoría. O Dépor non está na categoría que ten que estar. Encantaríame poder axudarlle a que volva estar máis arriba. Non tiven dúbida en ningún momento".
De feito, séntese querido na súa cidade e nota o agarimo de #ANOSAFORZA: "Teño moitos amigos, son de aquí. Pero a xente está ilusionada. Vexo moita ilusión en poder conseguir un obxectivo que todo o mundo quere. Oxalá que vaiamos todos da man para poder conseguilo e así facer gozar á cidade, que xa toca que viva unha alegría".
Atrás queda o seu debut co primeiro equipo nun amigable na localidade andaluza de Lepe o 26 de xullo de 2006, con motivo da concentración do Dépor en Isla Canela e con Joaquín Caparrós como adestrador. Mesmo foi elixido polo Club para a presentación das camisetas oficiais desa temporada, 2006-07, na DéporTienda, con Bodipo e Manuel Pablo.
O fútbol afastouno do club dos seus amores pero o destino volveuno a traer de volta á súa casa da Coruña, tal e como el mesmo recoñeceu na súa primeira rolda de prensa desta temporada: "Vía cada vez máis complicado (volver). Ninguén pensaba que o Dépor estaría nesta situación fai un par de anos. Hai que devolvelo canto antes onde se merece. No persoal vía moi complicado poder defender este escudo. Estou súper contento de poder facelo".
Non oculta o obxectivo do ascenso pero advirte que "para chegar, hai moitos pasos pequenos que hai que dar. Isto acaba de empezar. Temos que traballar moi duro para conseguir ese obxectivo. O máis importante é chegar ben á primeira xornada e aí a frase mítica de 'partido a partido', que está moi de moda pero é unha realidade. O obxectivo conséguese en maio ou xuño, non en xaneiro nin en setembro ou febreiro. O máis importante é o día a día, o traballo diario para chegar mellor aos partidos para conseguir o tres puntos".
Destacou que o ambiente no vestiario é "moi bo" a pesar de que "levamos poucos días xuntos". "Tiña a sorte de coñecer a bastantes compañeiros, á xente do Club xa a coñecía. Eu síntome como en casa desde o primeiro día que cheguei. Hai un ambiente moi san. Son dos que pensan que ese é un dos segredos para que as cousas funcionen".
Sobre o técnico, Borja Jiménez, indica que "me transmite moi boas sensacións. Ten as ideas claras. Os primeiros días non tiven a sorte de traballar moito co equipo porque estabamos con Alberto Casal, o adestrador de porteiros. Cando vaian pasando as semanas diranos o que necesita de nós".
A nivel persoal, desmente rotundamente que veña a retirarse ao Dépor. É máis, vese "no mellor momento da miña carreira deportiva, coa madurez que conseguín co paso dos anos. A portería é un posto moi distinto a outro. Non me expoño obxectivos a medio ou longo prazo, só este ano. Gozar moito todos xuntos para poder conseguir o obxectivo final".
