O ex xogador deportivista Antonio Sánchez Taboada, máis coñecido como Lexo (Sada, A Coruña, 16 de marzo de 1932), faleceu aos 91 anos de idade.
Lexo xogou 7 partidos co primeiro equipo deportivista nas temporadas 1954-55 e 1955-56.
O seu debut produciuse nada menos que nun derbi en Primeira División, ante o RC Celta en Balaídos o 23 de xaneiro de 1955, con derrota deportivista por 2-0. A súa última aparición foi en Riazor, tamén na máxima categoría, fronte á Real Sociedad o 15 de abril de 1956, con triunfo coruñés por 5-0.
Lexo fora fichado para o CD Xuvenil, entón filial branquiazul e co que xogou en Segunda División, e na primeira metade do curso 1955-56 estivo cedido no Racing Club de Ferrol.
O dianteiro sadense xogara con anterioridade no Canido, o Arsenal FC de Ferrol e o SRD Esteiro. Con posterioridade militou no Burgos CF e o Cartagena FC, antes de emigrar a Venezuela temporalmente, onde vestiu a camiseta do Deportivo Celta (o equipo do Lar Gallego de Caracas), o Deportivo Galicia e o Sporting Coruñés de Caracas.
O RC Deportivo quere mostrar o seu máis sentido e sincero pésame a familiares, amigos e ex compañeiros e compartir a súa dor con todo o deportivismo. DEP.
