Un dos capitáns, coruñés ademais, Pedro Mosquera, foi o protagonista da primeira rolda de prensa do RC Deportivo de 2017, esta mañá en Abegondo.
O centrocampista branquiazul pide a este novo ano "que o Dépor siga un ano mais en Primeira División. É o que todos queremos, tanto o equipo como a afección. Seguro que o imos conseguir".
A nivel persoal, asegura Pedro Mosquera que "cada vez estou mellor. Estou adestrando ben, mellor que nunca. O outro día tiven a oportunidade de xogar contra o Betis. Creo que estiven a bo nivel. Teño que mellorar cousas como todos pero pouco a pouco irei mellorando e participando máis".
Asume que "isto é Primeira División. E hai veces que estás no once e outras non o estás. Somos un plantel curto e imos ter oportunidades todos".
Advirte que nesta eliminatoria de Copa do Rei ante o Alavés (oitavos de final), co partido de ida este martes 3 de xaneiro en Riazor (21.15, Bein Sports), "temos postas todas as ilusións de pasar esta eliminatoria".
