O Deportivo, hoxe ademais co meta fabrilista Álex Cobo, comezou esta mañá a preparar a seguinte cita ligueira, a visita ao Real Zaragoza, prevista para o sábado 4 de maio en La Romareda (18:00 horas, Movistar Partidazo).
Con toda a semana por diante, José Luis Martí non quere ningún tipo de risco e, de acordo cos Servizos Médicos, dosificou o adestramento a 4 futbolistas que foron titulares o pasado venres no Nuevo Estadio de Los Pajaritos: Eneko Bóveda, Borja Valle, Edu Expósito e Carlos Fernández.
O lateral vasco exercitouse á marxe, con carreira continua e ximnasio; mentres que os outros 3 futbolistas realizaron só unha parte do adestramento co grupo: quecemento, un exercicio de automatismos de ataque e unha tarefa de posesión.
A continuación, retiráronse aos vestiarios mentres que o resto do cadro seguiu cun partido con 3 porterías a metade do campo 2.
Dubarbier, con molestias na cadeira dereita, non puido completar a mañá sobre o céspede.
Finalmente, David Simón realizou tamén unha parte da sesión co grupo e Krohn-Dehli seguiu co seu traballo de readaptación baixo a supervisión de Fran Molano, readaptador do primeiro cadro.
Mañá martes, o Dépor adestrarase de novo en Abegondo ás 11:00 horas.
