O partido comezou cos dous equipos moi enchufados. Lotina quería ver como chegaba a final de semana o Barcelona tras enfrontarse ao Real Madrid o domingo e ao Xerez o mércores. E os culés saíron enchufadísimos. Tanto, que sufría o Dépor para aguantar as acometidas visitantes. Así, Aranzubía abortaba un man a man con Ibrahimovic, ou ben Henry, no segundo pau, rematou lixeiramente desviado un centro pasado de Dani Alves ao que Ibrahimovic non puido chegar de tesoira.
Tanto foi o cántaro á fonte que acabou rompendo. Messi, de gran disparo raso desde fóra da área, facía o 0-1. Pero este Dépor "apunta moi alto", como comentou o propio Guardiola na sala de prensa. Sen deixar de traballar, de axudarse uns a outros en defensa, o conxunto branquiazul tivo a fortuna necesaria para, nunha xogada illada, empatar o partido. Saque longo de Aranzubía, Piquei despexa mal coa cabeza, o balón queda a Adrián, quen, tras gañarlle a partido ao seu par, cabecea á rede contando coa colaboración de Valdés. Faltaban sete minutos para o descanso e os xogadores festexaron coa bancada un milagre.
Tras o descanso chegaron os mellores momentos do Deportivo. O Barça pasouse o primeiros trinta minutos do segundo tempo sen apenas crear perigo. Si tiña o balón, pero despois era incapaz de transformar ese dominio en ocasións. Puido mesmo adiantarse o Dépor no marcador. Un bo centro de Filipe remátao Mista fóra nunha xogada calcada ao 0-1 de Xetafe.
Guardiola reacciona e retira a Henry por Pedro. E este movemento si fixo dano ao Dépor, con Gardado e Filipe moi castigados. Precisamente entre Dani Alves e Pedro fabricaron o centro que rematou Messi transformando o 1-2 na recta final. Ibrahimovic deixou pegada da súa calidade e, case co tempo cumprido, logrou o 1-3 definitivo. Gran traballo do Deportivo en defensa, cunha auténtica malleira física para todos os seus xogadores. Toca agora recuperar forzas e afrontar xa o encontro do próximo domingo 13 de decembro en Almería.
Deportivo da Coruña: Aranzubia; Manuel Pablo, Colotto, Lopo, Filipe Luís; Antonio Tomás (Bodipo; min.83), Sergio; Adrián (Juca; min.62), Juan Rodríguez, Gardado (Pablo Alvarez; min.87); e Mista.
Barcelona: Valdés; Alves, Piquei, Puyol, Abidal; Xavi, Busquets, Iniesta (Keita; min.89); Messi, Ibrahimovic e Henry (Pedro; min.70).
Goles: 0-1, min.27: Messi. 1-1, min.39, Adrián. 1-2, min.79, Messi. 1-3, min.88, Ibrahimovic.
Árbitro: Fernández Borbalán (Colexio Andaluz). Mostrou amarela a Dani Alves (min.48) e Abidal (min.77), por parte do Barcelona; e a Mista (min.58), por parte do Deportivo.
Incidencias: Practicamente cheo en Riazor, que presentou un gran mosaico antes do partido grazas a Telefónica.
