O Deportivo citou a 22 futbolistas para o sétimo amigable de pretemporada, ás 20:00 horas en Pasarón ante o Pontevedra, coa LVIII edición do Trofeo Luis Otero en xogo.
A novidade é a presenza de Fabian Schär, que podería debutar coa súa nova camiseta; e o regreso de Gerard Valentín, despois de superar a súa tendinite na pata de ganso, e Fede Cartabia. Cae da convocatoria o meta canteirán Francis, citado polo Fabril para o seu amigable en Laracha.
A directiva do Club granate fixou os seguintes prezos para as entradas de público:
-Tribuna: 16 euros (adulto, máis de 18 anos); 5 euros (xuvenil, de 14 a 18 anos) e 3 euros (infantil, de 7 a 13 anos)
-Preferencia: 12 euros (adulto), 5 euros (xuvenil) e 3 euros (infantil)
-Bancada de fondo: 8 euros (adulto), 5 euros (xuvenil) e 3 euros (infantil)
No adestramento desta mañá, con Luisinho e Carles Gil á marxe do grupo, Pepe Mel incidiu nos automatismos de ataque e en accións de estratexia ofensiva e defensiva.
Antes de viaxar a Pontevedra, todo o cadro está citado para comer ás 13:00 horas no Hotel Tryp Coruña. Mañá mércores, o Dépor retomará os adestramentos ás 10:30 horas na Cidade Deportiva de Abegondo.
