A 10 días dun dos grandes partidos da temporada en ABANCA-RIAZOR, o partido do domingo 7 fronte ao Málaga CF, o Real Club Deportivo superou os 22.000 socios. A día de hoxe o Club conta con 22.123 abonados, 21.035 deles con asento e acceso a todos os partidos en casa do equipo. Os outros 1.088 corresponden a Nen@s Dépor (353) e socios amigo (735). Do total de abonados, 1.761 son novas altas e o resto renovacións. Destas últimas 4.096 foron online ou a través do servizo de ABANCA.
A Oficina de Atención ao Deportivista continúa aberta para altas e renovacións na súa localización provisional dos Despachos de billetes do Palacio dos Deportes de Riazor en horario de 10:00 a 13:30 e de 16:30 a 19:00 h. de luns a venres.
O que non pecha ningún día, a ningunha hora, é o sistema de renovación online de abonos do Dépor en abonos.rcdeportivo.es, onde é posible renovar facilmente o carné do Dépor para esta temporada 2018-2019.
