O Real Club Deportivo da Coruña S.A.D. quere agradecer a José Antonio Martínez os seus anos de dedicación e profesionalidade ao club. A súa voz é xa unha parte da historia do Deportivo.
José Antonio Martínez Arias
José Antonio Martínez Arias comezó a súa andaina profesional en Radio Mocidade da Coruña, en 1957, no programa "Copacabana", como colaborador da sección de deportes. Ese mesmo ano entra a formar parte da redacción de deportes do Ideal Galego, onde chegaría a xefe da mesma. Xa en 1973, intégrase de cheo na redacción de deportes de Radio Mocidade, e comeza a retransmitir partidos do Real Club Deportivo.
En abril de 1985, tres anos despois de abandonar O Ideal Galego, ponse en marcha a Radio Galega, da que forma parte desde o seu inicio. Exerce como correspondente na Coruña e delegado de deportes da cidade. Foi o primeiro locutor que retransmitiu en galego un partido de Real Club Deportivo, equipo ao que acompañou desde aquela.
Ademais, foi correspondente de numerosas publicacións: "O Progreso", "A Folla do Luns", "Faro de Vigo", o xornal deportivo "Din", "Mundo Deportivo", etc.
José Antonio Martínez desenvolveu un labor comprometido co deporte. Así, foi presidente do C.D. Hércules, da Federación Coruñesa de Baloncesto, do Colexio Coruñés de Arbitros de Baloncesto, secretario provincial de Deporte Escolar, vogal de zona da Federación Española de Baloncesto, árbitro de balonmán etc.
