Patri López foi a protagonista esta mañá na sala de prensa de Abegondo. Comenta tralo triunfo do Deportivo ABANCA na primeira xornada que é "bonito empezar con vitoria. Anímache a ir a pola seguinte. Estamos a adestrar moi ben non só esta semana senón durante toda a pretemporada. Temos ganas de que chegue xa a fin de semana para sumar outra vitoria e seguir neste bo camiño".
Precisamente do choque ante o FC Barcelona B, lembra que ao equipo azulgrana "gústalle ter a pelota, ser o dominador do partido. Conseguimos facer as cousas ben. Quitarlle a posesión a un equipo como o Barça é moi complicado. Nós lográmolo. Xogamos quizais demasiado vertical pero a presión delas era o que nos obrigaba a facer. Ao final con dúas accións a balón parado chegaron os goles. O partido estivo moi traballado e esa é a liña que temos que seguir. Cometemos moitos erros pero era o primeiro partido. Quédanos toda a temporada para corrixilo".
Do CE Seagull, rival este domingo 12 de setembro (12:00 horas) no Estadi Municipal de Badalona na 2ª xornada de Reto Iberdrola, a carrileira galega advirte que "vai ser un partido complicado, a nosa primeira visita fóra de casa. É un campo complicado. Para empezar é artificial e non estamos afeitas a esta superficie. Creo que vai ser un dos puntos chave do partido. Elas son un equipo moi competitivo, que vai facer o partido moi igualado".
Destaca ademais das catalás o feito de que "aproveita os erros do rival. Tentaremos non concederlles moito. Pero non baseamos o noso xogo no que elas vaian facer senón que sairemos a xogar como o vimos facendo esta pretemporada".
A nivel persoal afronta esta temporada Patri López "con moitas ganas e ilusión de conseguir os obxectivos que nos marcamos desde o primeiro día. Ao final toda xogadora con ficha B quere algún día dar ese salto ao primeiro equipo. Conseguino a base de moito esforzo e traballo; e tamén grazas tanto a Manu (Sánchez) como a Pablo (Pereiro) e a Miguel (Llorente) e o seu corpo técnico, que me están dando a confianza que necesito para poder dar a mellor versión de min".
Cre que con tantos cambios no cadro e no corpo técnico, este ano é "empezar de cero. Non desde cero porque hai unhas bases, seguimos xogadoras que xa estabamos o ano pasado, no corpo técnico hai xente que estaba o ano pasado. Era unha renovación non necesaria pero si obrigada polo feito de que moitas xogadoras tiveron ofertas mellores para quedar en Primeira División e demostrar o seu talento, caso de Athenea ou Iris e Gaby. Están a facerse as cousas ben. Somos un cadro con moito futuro porque a maioría somos xogadoras moi novas. A incorporación ao proxecto de Miguel e de Ana (segunda adestradora) axuda a que o ambiente sexa moi agradable, moi cómodo. Todos sentímonos moi ben na Coruña e no Dépor ABANCA. E iso nótase no campo".
Finalmente, capitá esta temporada con Alba Merino e Cris, Patri López afirma que "é un orgullo. Cheguei ao equipo en 2016 na súa primeira temporada. Aínda que é certo que me fun cedida ao Friol, o Dépor ABANCA é ao final o Club no que empecei a xogar de maneira máis seria, profesional. Despois de tantas temporadas é moi satisfactorio ver que ao final o teu traballo ten recompensa. Ser capitá é unha recompensa ao meu traballo, ao que fago diariamente, ao meu esforzo. Ao final é moi reconfortante".
