Mario Soriano estreouse esta mañá en Abegondo cos seus compañeiros. O novo xogador deportivista, cedido polo Atlético de Madrid esta temporada, completou con normalidade esta primeira sesión semanal do equipo de cara ao partido ante o CD Tudelano deste domingo 5 de setembro (17:00 horas, Footters).
Trilli e Noel están coa selección española sub-19 xunto a Dani Barcia; e Celso Borges está concentrado con Costa Rica para as primeiras eliminatorias do Mundial de Qatar 2022. Pola súa banda, Valín, Menudo e Diego Aguirre realizaron traballo específico aínda que este último si traballou xa nalgunhas tarefas co grupo; co que avanza na súa recuperación.
Alberto, Yeremay, Davo e Mella foron hoxe mércores 1 de setembro a representación de #ANOSACANTEIRA no primeiro equipo.
Após un quecemento, o corpo técnico 'recibiu' ao cadro cun exercicio de forza con finalizacións. Unha tarefa de posesión e fútbol en espazo reducido con duelos, completaron o traballo sobre o céspede.
Mañá xoves, o Dépor adestrarase en ABANCA-RIAZOR a partir das 10:30, nunha sesión na súa totalidade a porta pechada.
