Tras o partido de Copa do Rei, no que Lotina recuperou a defensa de catro traseiros para tratar de eliminar ao Almería, o Deportivo volveu esta tarde na Romareda ao seu clásico debuxo de cinco defensores. O obxectivo, recuperar a solidez defensiva que tan bos resultados deu ao equipo branquiazul durante boa parte da primeira volta da liga. Incluso o técnico tratou de axustar de novo os mecanismos defensivos o pasado sábado, na última sesión previa ao partido.
O partido ía para 0-0 cantado. O Zaragoza anda xusto de creatividade ofensiva e o Dépor, atascado en ataque, si resolvía con certa solvencia os envites maños. Pero Boutahar, de falta e con fortuna, rompeu o partido no minuto 38 cun tanto de rebote. O balón tropeza en Lassad, que estaba na barreira, e entra polo lado contrario ao que se lanzou Aranzubía.
Na segunda metade, Lotina tratou de buscar cambiar o rumbo do choque coa saída de Valerón. Pero o cambio apenas si repercutiu en perigo para a meta de Leo Franco. Ao revés, co Dépor envorcado, Aranzubía, moi lonxe da súa área, abortou coas súas rápidas saídas dous bos contragolpes zaragocistas que ben puideron sentenciar o partido.
A tarde non era do Dépor, que ademais perdeu a Manuel Pablo por lesión. Sufriu un forte golpe no nocello esquerdo e foi sustituído por Seoane.
Ao final, co Dépor atrancado e coas ideas "xeadas" pola fría tarde de Zaragoza, o partido finalizou con 1-0. Hai que pensar xa no Sevilla, o sábado.
Zaragoza: Leo Franco; Diogo, Jarosik, Contini, Obradovic; Boutahar (Lafita, m. 67), Gabi, Ponzio, Ander Herrera (Jorge López, m. 82); Braulio e Sinama-Pongolle (Bertolo, m. 51).
Deportivo: Aranzubía; Laure, Lopo, Colotto, Aythami, Manuel Pablo (Seoane, m. 77); Juan Rodríguez (Pablo Alvarez, m. 63), Rubén, Antonio Tomás; Lassad (Valerón, m. 71); e Adrián.
Gol: 1-0. min.38: Boutahar.
Árbitro: Fernández Borbalán, do Colexio Andaluz. Amoestou por parte do Dépor a Rubén e a Lauren.
