Valioso punto do Dépor en Málaga, a pesar de xogar con dez a metade do partido

O Málaga tratou durante toda a semana de converter A Rosaleda nunha pota a presión para tombar ao Deportivo. E logrou o obxectivo de encher o Estadio. Pola súa banda, o Deportivo, tras a vitoria ante o Mallorca do pasado domingo, viaxou disposto a dar un paso máis cara á salvación. No entanto, Lotina variou o seu debuxo e volveu o trío Juan Rodríguez, Rubén Pérez, Antonio Tomás no centro do campo, con Valerón por diante e Xisco como único punta.
 
O inicio e o final da primeira metade foron para o Málaga. Rondón, o futbolista que tivo as mellores ocasións do partido, puido marcar nun man a man con Aranzubía. Pero o seu chute foise demasiado alto. Tras unha primeira avalancha inicial andaluza, o Dépor asentouse no campo e dispuxo dalgún que outro bo achegamento grazas sobre todo ao bo toque de balón de Andrés Gardado. Pérez Lasa anulou correctamente un gol ao Málaga por falta a Aranzubía. Dúbida saca unha falta, a meta deportivista trata de despexar cos puños e Rondón obstaculízao claramente na área pequena. O balón, despexado defectuosamente polo porteiro do Dépor, cae a Seba que marca, aínda que a xogada estaba xa invalidada.
 
Pérez Lasa erixiuse en protagonista do partido ao expulsar de forma moi rigorosa a Laure por unha dobre acción con Eliseo. Primeiro por unha falta no minuto 38 e logo, no 44, cando precisamente foi o atacante malacitano o que cometeu falta sobre o defensor deportivista. Esta discutida decisión do colexiado marcou o desenvolvemento do partido. Morel entrou por Valerón xa ao comezo da segunda metade. Había que blindar a portaría e aguantar polo menos o 0-0.
 
Pero foi o Deportivo o que saíu mellor ao campo na continuación. De feito, Xisco puido marcar pero non precisou o seu dobre disparo ante Caballero. Logo, loxicamente, foi o equipo local o que levou as rendas do partido pero a seguridade e a experiencia de Aranzubía e o traballo de todo o bloque permitiron sumar un valioso punto que achega máis a permanencia.
 
 
Málaga CF: Caballero; Gámez, Stadsgaards, Demichelis, Eliseu; Portillo (Quincy, m. 65), Apoño, Recio (Maresca, m. 58), Dúbida; Fernández (Juanmi, m. 77) e Rondón.

Deportivo: Aranzubía; Laure, Colotto, Lopo, Manuel Pablo; Rubén Pérez, Juan Rodríguez (Juan Domínguez, m. 72), Gardado, Antonio Tomás; Valerón (Morel, m. 46) e Xisco (Lassad, m. 85).

Árbitro: Pérez Lasa (Colexio Vasco). Mala, moi mala actuación. Por parte do Deportivo expulsou a Laure inxustamente no minuto 44 por dobre cartón amarelo. Tamén foron amoestados Gardado e Juan Rodríguez.