- Foto: Hernán Contreras/cafemchile2018 -
Gabriela García 'Gaby', xogadora do Deportivo ABANCA, está a participar con Venezuela na oitava edición da Copa América feminina, que se celebra en Chile.
Na Primeira Fase, Venezuela, no Grupo B, ten como rivais a Brasil, Ecuador, Arxentina e Bolivia.
Onte mércores 11 de abril (esta pasada madrugada en España) o poderosa Brasil, unha das favoritas, venceu (4-0) de maneira xusta ao equipo venezolano no Estadio Francisco Sánchez Rumoroso de Coquimbo.
A dianteira deportivista xogou completo un partido moi esixente a nivel físico, pola tremenda calidade e fortaleza das futbolistas brasileiras.
Mañá venres en Coquimbo (16:45 hora local), Venezuela xógase ante Arxentina o pase ao cuadrangular final. Ambas as seleccións suman 6 puntos pero está por diante na táboa a 'Vinotinto' grazas ao seu mellor diferencia de goles.
O pasado luns 9 de abril, Venezuela goleou (8-0) a Bolivia en Coquimbo. Gaby foi titular e foi relevada no minuto 59 pola súa compatriota Ysaura Viso.
A dianteira do Deportivo ABANCA tivo dúas claras ocasións, foille anulado un tanto no minuto 16, e deu unha asistencia de gol a Deyna Castellanos no minuto 49, que supuxo o 2-0.
E o xoves 5 de abril foi o debut da 'Vinotinto', ante Ecuador, tamén en Coquimbo. Gañaron as venezolanas (0-1), grazas a un gol de Deyna Castellanos no minuto 85. Gaby disputou os 90 minutos e foi durante boa parte do encontro a xogadora que levou máis perigo á meta rival.
Estes son os partidos da primeira fase para a selección de Venezuela:
Xoves 5 de abril
ECUADOR 0 - VENEZUELA 1
Luns 9 de abril
VENEZUELA 8 - BOLIVIA 0
Mércores 11 de abril
BRASIL 4 - VENEZUELA 0
Venres 13 de abril
16:45 (hora local): ARXENTINA - VENEZUELA, no estadio Francisco Sánchez Rumoroso (Coquimbo)
Os dous primeiros clasificados de cada grupo acceden a un cuadrangular final, cuxas tres xornadas terán lugar os días 16, 19 e 22 de abril no estadio La Portada da cidade de La Serena e do cal sairá o campión.
Ademais, os dous primeiros clasificados terán billete para a Copa do Mundo Francia 2019, mentres que o terceiro accederá á repesca. Igualmente, o campión logrará a súa clasificación para os Xogos Olímpicos Tokio 2020 e o subcampión seguirá tendo opcións de acudir a Xapón a través dunha repesca. Os catro primeiros tamén obterán pasaporte aos Xogos Panamericanos Lima 2019.
