O Deportivo ABANCA retomou a competición da Copa Galicia de Segunda División Nacional cun triunfo hoxe venres 24 de maio no campo das Relfas de Vigo ante o Sárdoma CF (0-5), en partido correspondente á 4ª xornada no grupo 1º. Peke -2-, Lía, Carlota e Ainhoa foron as goleadoras branquiazuis.
O conxunto deportivista afrontou o choque con 10 futbolistas do Deportivo ABANCA B na convocatoria, das que 5 foron titulares: Anita, Patri López, Laura Rivas, Sofía e María Calvo; mentres que outras 4, Antía, Ainhoa, Carlota e Andrea Agulló saltaron ao partido desde o banco.
Deportivo ABANCA: Anita, Patri López, Laura Rivas, Raquel, Erika, Sofía, Teresa Abelleira, Lía, Peke, María Calvo e Nuria. Tamén xogaron: Miralles, Antía, Ainhoa, Carlota e Andrea Agulló.
O partido foi igualado na primeira metade, que finalizou con empate (0-0). Ás branquiazuis, despois dunha semana de actos institucionais e merecidas celebracións polo ascenso á Liga Iberdrola, custoulles entrar no partido.
Na segunda metade a decoración cambiou e o Dépor ABANCA fixo valer a súa superioridade física e técnica, sobre todo ao marcar o primeiro gol.
Con este resultado, o Dépor ABANCA é líder do grupo con 12 puntos nos seus 4 partidos xogados. O Atlántida de Matamá tamén ten 9 puntos, aínda que con 1 partido máis disputado. Con 7 puntos é terceiro o Sárdoma CF, tamén con 1 partido máis xogado que as pupilas de Manu Sánchez.
A próxima cita do Deportivo ABANCA será mañá sábado 25 en Abegondo, con entrada libre para os afeccionados, ante o Victoria FC de Santiago (18:00 horas), en partido correspondente á 6ª xornada.
Manu Sánchez citou ás seguintes xogadoras: Malena, Curbelo, Silvia Mérida, Iris, Kika, Alba Suárez, Alba Merino, Lara, Patri López, Patri Díaz, Cris, Yamamoto, Sara Piñeiro, Michelle Romero, Lucía e Gaby.
Os resultados do Deportivo ABANCA nesta Copa Galicia son os seguintes:
Sárdoma CF 0 - Deportivo ABANCA 3 (Alba Merino, Kika e Lía)
Deportivo ABANCA 1 (Alba Merino) - Atlántida de Matamá 0
Victoria FC 2 - Deportivo ABANCA 4 (Gaby, Peke, Carlota e María Calvo)
Sárdoma CF 0 - Deportivo ABANCA 5 (Peke -2-, Lía, Carlota e Ainhoa)
