O RC Deportivo continuará o vindeiro sábado 16 de marzo, no décimo cuarto partido de Liga en ABANCA-RIAZOR, fronte á CE Sabadell FC (18:00 horas), coa iniciativa "O Día Dé", coa que abre o Palco de Honra do Estadio á afección e á cidadanía. Este décimo cuarto encontro será "O Día Dé Institucións", no que o RC Deportivo convida a profesionais do mundo do deporte dos principais organismos públicos vinculados á actividade do Club.
Máis de medio centenar de profesionais da industria do deporte dos principais organismos públicos vinculados á actividade do RC Deportivo (Concello da Coruña, Concello de Abegondo, Deputación da Coruña e Xunta de Galicia) terán a ocasión de gozar do partido desde o palco principal do recinto, a localidade máis exclusiva e con mellor visibilidade de ABANCA-RIAZOR. O Club quere agradecer deste xeito o seu labor ao longo dos anos na actividade do RC Deportivo na cidade da Coruña, no veciño concello de Abegondo e en toda a comunidade autónoma.
En cada partido en ABANCA-RIAZOR esta temporada, máis da metade das localidades do Palco de Honra estarán dedicadas a un colectivo da cidadanía ou a un sector da afección, para facer a entidade máis próxima e dar protagonismo á masa social deportivista e agradecer o seu excepcional apoio unha temporada máis.
