O RC Deportivo ten entre os seus plans para esta temporada un proxecto de mellora das instalacións e dos recursos para coidar o benestar dos xogadores e xogadoras de todas as categorías, así como o dos equipos de traballo de Abegondo, que incluirá a reforma do ximnasio, comedor e todas as zonas comúns para os cadros do Club.
Neste marco de melloras, as persoas que traballan nos campos da Cidade Deportiva xa dispoñen dunha novidade: vehículos eléctricos cedidos por ABANCA para poder desprazarse de forma máis rápida polas instalacións de Abegondo.
Estes vehículos permitirán mellorar a eficiencia no traballo dos equipos técnicos e deportivos, así como as condicións nas que levan a cabo a súa axenda diaria.
Son unha das primeiras novidades que xa se incorporaron para esta temporada dentro dunha serie de melloras que afectarán a todas as instalacións do club na Cidade Deportiva, tal e como avanzou Álvaro García Diéguez no seu recente nomeamento como presidente do RC Deportivo.
