- Foto: @fedefutbolcrc -
A Costa Rica de Celso Borges, xa clasificada para os cuartos de final da Copa de Ouro da CONCACAF, xógase mañá martes 20 de xullo ante Xamaica a primeira posición do grupo C.
O encontro, correspondente á terceira e última xornada desta primeira fase, xogarase no Explora Stadium de Orlando ás 19:00 (hora local, 1:00 do mércores 21 en España).
O pasado sábado, Costa Rica impúxose (1-2) a Surinam no segundo choque do grupo. Celso Borges bateu unha marca coa Tricolor ao disputar o seu partido número 23 na Copa de Ouro da CONCACAF, equivalente á Eurocopa ou a Copa América, repartidos en seis edicións desde 2009.
O centrocampista branquiazul foi de novo titular, disputou os noventa minutos e de novo o seu gol, esta vez no minuto 59 e segundo neste torneo, supuxo o triunfo 'tico'.
A selección de Guadalupe, clasificada da fase preliminar, foi o primeiro rival de Costa Rica o pasado luns 12 de xullo.
O mediocentro deportivista saíu de inicio no debut do seu novo seleccionador, Luis Fernando Suárez.
Celso Borges xogou completo o choque e anotou o terceiro tanto no minuto 69, chegando desde segunda liña, para certificar a primeira vitoria 'tica' por 3-1.
O calendario de Costa Rica, cos resultados dos partidos xa xogados, é o seguinte:
Luns 12 de xullo
COSTA RICA 3 - GUADALUPE 1
Venres 16 de xullo
SURINAM 1 - COSTA RICA 2
Martes 20 de xullo (19:00 hora local, 1:00 do mércores 21 en España)
COSTA RICA - XAMAICA
