RCD / NOVAS

A familia de Eladio Muíños cede ao Deportivo o seu arquivo gráfico, que poderá consultarse en ReCorDos

27/09/2018 12:00

Muíños, primeiro pola dereita de pé, no taller de Malde co Teresa Herrera do 50 aniversario

O arquivo gráfico de Eladio Muíños, personaxe moi vinculado á historia do Trofeo Teresa Herrera e do RC Deportivo falecido o pasado ano, estará a disposición de todos os afeccionados na web ReCorDos.

Con motivo do recente anuncio da disputa da 73ª edición do Trofeo entre o Deportivo e o Athletic Club, o RC Deportivo quere adiantar a exhibición de parte do denso material cedido pola filla de Eladio Muíños, Loli. Desde este momento poden consultarse as imaxes -en moitos casos asinadas por fotógrafos históricos da cidade como Blanco ou Pardo Reguera- que gardan relación coas participacións do equipo vasco no Teresa Herrera, no que volverá participar o próximo 14 de novembro após 34 anos de ausencia.

Eladio Muíños Díaz (A Coruña, 4 de maio de 1926 - 6 de decembro de 2017) dedicou boa parte da súa vida á recompilar a historia do Deportivo e do Teresa Herrera. Os seus principais traballos foron a publicación, xunto ao xornalista Pedro de Llano 'Bocelo', do libro '82 anos de historia', en 1988, e o deseño do trofeo do 50 aniversario que o Deportivo conquistou en 1995 ao vencer na final ao Real Madrid.

Muiños, que tamén foi durante moitos anos presidente da Pena Deportivista O'Tizón, fora alumno de Rafael Barros Merino, deseñador dos trofeos Teresa Herrera até 1969, na Escola de Artes e Oficios da Coruña. Para a edición do cincuentenario, Muíños deseñou un trofeo que aúnaba os diferentes deseños históricos, no que a Torre de Hércules (que se entrega desde 1970) asomábase desde o interior dunha copa de catro asas que representaba o enfurecido mar de Riazor, para cuxa fabricación se utilizaron 32,7 quilos de prata e 7,4 de ouro.

Durante os anos 80 e 90, Muíños formou parte do Comité Organizador do torneo, como cabeza visible das 'Expo Fútbol' que se realizaron ao redor do Teresa Herrera e cuxa primeira edición tivo lugar en 1985.

Na páxina web recordos.rcdeportivo.es calquera afeccionado ten a posibilidade de achegar o seu granito de area á reconstrución da historia do Club. Un novo dato sobre unha imaxe mediante un comentario, a cesión dunha nova fotografía, unha historia persoal ao redor da instantánea en cuestión...

A mellor opción é a de achegarse coa fotografía orixinal ás oficinas do Club na Praza de Pontevedra, 19 1º (de luns a venres de 9:00 a 14:00 e de 16:00 a 19:00 horas) para proceder á súa dixitalización coa maior calidade posible. Unha vez dixitalizada, a fotografía orixinal seralle devolta ao propietario, xunto á copia dixitalizada da mesma nunha memoria USB.

O cedente sempre conservará a propiedade da imaxe, que prestará ao RC Deportivo soamente para uso institucional. Todas as fotos publicadas están protexidas con marca de auga para evitar o seu uso fraudulento.

Tamén existe a posibilidade de darse de alta en "Recordos en Branco e Azul", creando, coa mesma sinxeleza que en calquera rede social, un perfil de usuario a través do que quedará constancia de que a foto é da súa propiedade.

A partir de aí, o usuario poderá comentar calquera fotografía e adquire a posibilidade de compartir co deportivismo unha nova imaxe. Cando efectúe a cesión directa da instantánea, esta non será visible de inmediato, pois deberá recibir o visto e prace en función de diversos estándares de calidade fotográfica e valor histórico.