Álex: "Os xogadores temos que mellorar o noso rendemento e apoiados polas indicacións novas que teñamos, conseguir mellores resultados"
Álex Bergantiños pasouse esta mañá pola sala de prensa de Abegondo.
O capitán branquiazul ten claro "cando hai un cambio sempre hai ilusión nova en todo o mundo, en xogadores, en afeccionados; e máis agora, que todo se vai a intensificar moito máis porque se achega o momento determinante da temporada. Pasou igual cando se foi Borja e veu Óscar tamén os primeiros partidos había esa expectativa. É lóxico. Está claro que se a acompañas de bos resultados pode levarche a unha inercia anímica moito mellor, pero iso témonolo que gañar. Non chega só con que se cambiou de adestrador e agora xa todo vai ser precioso. Os xogadores temos moito que ver, temos que mellorar o noso rendemento e loxicamente apoiados polas indicacións novas que teñamos, conseguir mellores resultados para que esa onda póidase xerar".
Do técnico coruñés destaca que "non ten moito tempo para facer todo o que imaxino que terá na súa cabeza, pero si que vai tentar cambiarnos algúns mecanismos, algunhas cousas que faciamos. Niso están, un pouco ás alancadas pola prema que temos, sobre todo do obxectivo que é tan a curto prazo e tentando xestionar esas présas que podamos ter agora".
Sobre estes meses con menos minutos de xogo, comenta que "todos os xogadores temos o noso ego de querer participar, de querer axudar. Pasei por etapas de todo tipo na miña carreira, tentando estar sempre sumando no día a día, preparado para se nalgún momento tocaba achegar o domingo e se non sumar en cada adestramento para que sobre todo os que non estabamos a xogar seguísemos enganchados para cando fósemos necesarios".
Álex admite que calquera cambio de adestrador "non é algo agradable nin moito menos. Está claro que cando se cambia é porque as cousas non saíron como se proxectaban, co obxectivo que se expuñan. Este ano outra vez 3 adestradores diferentes e é unha mostra de que non saíron ben as cousas".
Aprecia no ambiente "cada vez máis nervios. Estamos no terceiro ano seguido nesta categoría. #ANOSAFORZA e todos queremos volver xa e loxicamente iso fai que haxa máis nervios. Neste ano hanse focalizado moitísimo máis na figura do míster, entendo que era a cara máis visible; pero tamén pasou un pouco con Borja os últimos partidos antes de que se fose. Ao ser a cara máis visible, onde recae esa imaxe pública e ás veces é desagradable porque a ninguén lle gusta que no seu traballo sexa menosprezado, xulgado desa maneira. Pero é parte da nosa profesión. Tamén ás veces temos xogadores que son pitados, que son peor tratados que outros e é desagradable. Non queremos que pase pero entendemos tamén que é parte da profesión e de que o público sempre mostra a súa opinión".
Cre que Rubén de la Barrera "quere ternos a todos enchufados. Sempre estiven en toda a miña carreira tentando estar o mellor preparado posible. Loxicamente este ano tiña moi poucos minutos, sempre é difícil reengancharse cando tes menos ritmo competitivo, pero logo será el o que xulgue e xúlgueme a min como un máis para ver se podo sumar ou en que parte podo sumar, se con máis minutos ou con menos minutos. Ao final o que vai buscar é o ascenso do Dépor e o maior rendemento e inmediato que vexa nos adestramentos para competir".
En plena recta final da temporada, Álex opina que o impacto maior do cambio de técnico "vai ser o anímico e mental polo que supón sempre este tipo de cambios a nivel vestiario, dinámicas, contorna... No futbolístico Rubén leva 2 días. Imos ter o adestramento de hoxe e o de mañá pola mañá e vai tentar meter as máximas cousas posibles. Logo aí está tamén a responsabilidade nosa, dos xogadores, de ver como asumimos, aceptamos e aprendemos eses cambios, que capacidade temos para implantalos canto antes. Non é o mesmo que empezar cunha pretemporada de cero nin con máis marxe de partidos, pero é a situación que hai e ao final todos imos ter o foco posto en tentar absorber o máximo posible e aplicalo o máis rápido posible para estes partidos".
Lembra a "toda a cidade na rúa" tal día como hoxe, 19 de maio, hai 23 anos na xornada que supuxo o título de liga; e subliña que "a nosa xeración que vivimos esa época gloriosa do Club transmitímolo con orgullo aos nosos fillos, aos nosos sobriños... Seguímolos levando ao campo. É algo cultural na cidade, o ir a ABANCA-RIAZOR máis aló da categoría, do rival, de que xogue o Dépor ABANCA, o Xuvenil A, o primeiro equipo. Ao final a xente é do Dépor, a xente vive en torno ao Dépor e goza indo apoiar ao seu Club. É algo que como digo sempre temos que coidar e do que temos que estar moi orgullosos".
Finalmente a nivel persoal, a aspiración do futbolista coruñés "é ascender. Asino non xogar ningún minuto de aquí ao final e que o equipo ascenda. É o que queremos todos os deportivistas. Levamos bastantes anos de sufrimento, de malos resultados, de finais dramáticos. O único horizonte é ese, tentar sumar o máximo posible no día a día e no que Rubén considere que poida achegar e que o equipo consiga o ascenso. É o que todos temos en mente e non podo ter en mente ningún outro obxectivo nin horizonte que conseguir agora sumar o máximo posible para que o equipo ascenda".
Iso si, recalca que "me considerei preparado antes (con Borja Jiménez e Óscar Cano) e estarei preparado agora (con Rubén de la Barrera) para tentar achegar no que necesiten".
