Eneko Bóveda e Dani Giménez pasaron pola zona mixta de ABANCA-RIAZOR.
O defensor vasco agradeceu "como se envorcou a xente. Todo aquel que sente o Dépor, que se alegra polos seus triunfos, na súa medida ten a posibilidade de poñer o seu graniño de area". "Agradecer esa onda de ilusión que sente, que sentimos e, pola nosa banda, en nome do cadro, animar a que estean connosco porque aínda que ás veces custe crernos, nós facemos o que podemos", engade.
Asegura que agora "estamos a competir. Máis aló dos resultados, estivemos por baixo do nivel que esixe esta competición. Agora estamos en Segunda División".
Bóveda está de acordo con Fernando Vázquez e insiste que, máis que mirar a clasificación, "temos que gañar 10 partidos. Poden ser estes 10 ou os últimos 10, ou pode ser perdendo 1 e gañando 1. É posible que en momentos nos vexamos clasificatoriamente mal ou nun momento dado, até o vexas medio encamiñado e con todo non o tes porque a cantidade de vitorias que temos que facer é grande e non hai marxe para ter un mes malo".
Pola súa banda, Dani Giménez, providencial con varias intervencións de mérito na segunda metade, explica que "moitas veces a mentalidade cambia coas vitorias. Ao ter un adestrador que é un ídolo da afección, parece que a xente se enganche máis e aos poucos os xogadores creámonolos. Queda moitísimo para gañar, queda mellorar, queda ter máis ritmo pero é un inicio moi bo estas vitorias consecutivas. Fai que a xente que o estivemos pasando mal tanto tempo e a afección creamos en que podemos e ímolo a conseguir".
O meta deportivista ademais advertiu que Emre Çolak "é un xogador chamado a marcar diferenzas. É un rapaz que loita moito. Conxugar esa loita, con esa implicación que ten desde o primeiro día coa súa calidade, para nós é importantísimo. Estou seguro que el vai ser unha das bases do equipo para crecer e para loitar polo noso obxectivo, que é gañar cada partido que xoguemos".
Lembra que o equipo pasou "por momentos duros. E tampouco nos podemos equivocar, vano a seguir sendo. Isto non cambia da noite para a mañá. Imos ter que sufrir moitísimo, imos ter que gañar partidos como estes 3 últimos á heroica, defendendo todos, sendo un equipo moi implicado. Non imos gañar todos os partidos, pero ímolo a tentar, centrándonos en cada semana, en cada rival. É a única maneira de poder conseguir sacar isto adiante".
