O peche da Temporada 2020-2021 deixa unha serie de cifras destacadas que revelan, un ano máis, o gran respaldo que sustenta ao Real Club Deportivo, personalizado especialmente nas súas socias e socios.

Dous datos plasman o incomparable apoio do Deportivismo ao seu equipo e ao Club despois da dura situación vivida á conclusión da campaña 2019-2020 e ás restricións de acceso para a temporada 2020-2021.

O primeiro, o número total de abonados (22.411), marca histórica da terceira categoría do fútbol español e cifra que supera a 32 dos 42 equipos de Primeira e Segunda División. O segundo, o enorme número de altas (3.255), cantidade só superada nas dúas últimas décadas polas últimas catro temporadas na división de honra (2014-2018) e o último curso dos vinte consecutivos na mesma (2010-2011).

Na distribución por xénero dos 22.411 abonados, 4.245 dos mesmos son mulleres, é dicir, un 19 %, o que supón practicamente unha quinta parte. Os homes suman 17.154, ou o que é o mesmo, algo máis de tres cuartas partes (76 %), mentres que o 5 % restante corresponde a 786 empresas e 226 penas.

O uso das novas tecnoloxías para a xestión dos carnés alcanzou o seu punto culminante esta temporada debido á pandemia pola obrigada atención telemática ás persoas abonadas. Tramitáronse preto de 20.000 abonos online, o que supón case un 87 %, polas algo menos de 3.000 xestións realizadas na OAD, pouco máis dun 13 %, xusto ao revés que nos anos precedentes, desde que, en 2014 se implementou esta modalidade de xestión.

Marathón foi a bancada con maior número de socios, 6.045, aínda que a de maior porcentaxe de ocupación foi Pavillón, cun 71,5 % polo 66,6 % da bancada da torre. O sector con maior cantidade de abonados e con maior porcentaxe de ocupación é Marathón Inferior, con 3.689 socios e un 89,4 %.

A cidade da Coruña concentra, cun total de 13.255, o 59 % dos abonados. A provincia acumula 7.067 máis, sendo os concellos máis fieis Oleiros, Culleredo (ambos con algo máis de 1.000 socios), Arteixo e Cambre (por encima de 700). Lugo preséntase como a provincia máis deportivista fóra da Coruña, con 468 abonados, mentres que Pontevedra suma 393 e Ourense queda en 211, o que supón que o Real Club Deportivo conta con máis de 1.000 socios das outras tres provincias galegas.

O resto de España alberga a 815 abonados branquiazuis. Madrid (313) e Barcelona (104) son as provincias con máis socios deportivistas. Huesca e as cidades autónomas de Ceuta e Melilla son as únicas sen socios branquiazuis.

Fóra de España, o RC Deportivo conta con 202 socios repartidos en 25 países de tres continentes: Europa, América e Asia. Suíza (60) e Reino Unido (43) son as nacións máis deportivistas dunha lista na que se atopan as distantes Xapón (2) e Singapur (1).

En canto á idade dos abonados, o número máis alto segue concentrándose na franxa de 30 a 39 anos, con 4.158 socios, o que alcanza o 18,6 %. A idade con maior cantidade de abonados son os 39 anos, cun total de 478.