RCD / NOVAS

David Simón: "Parece que collemos esa chispa. Demos un paso adiante"

30/01/2019 21:11

David Simón asegurou esta mañá na sala de prensa de Abegondo que, "agora que chegan partidos importantes, hai que seguir así, con esa confianza que volvemos a coller".

O lateral canario indicou que o pasado domingo en Xixón, "nun partido duro, xogamos as nosas armas moi ben. Soubemos sufrir. Unha maior moral para afrontar este tramo que vén máis duro".

Ante a visita do CD Tenerife este sábado 2 de febreiro a ABANCA-RIAZOR (20:30 horas, LaLiga 1|2|3), David Simón, natural das Palmas e formado na canteira da UD Las Palmas, non o ve na Coruña como un partido especial: "Cando estaba alí se cadra podía ser. Agora é un partido máis onde temos que sacar os 3 puntos, ante un rival moi difícil, que se reforzou moi ben".

Está convencido de que despois dunha primeira volta "que non foi como esperaban, seguramente eles tentarán dar un paso á fronte. Nós centrados en nós, saber que toca gañar en ABANCA-RIAZOR".

Apunta que "temos que estar moi concentrados e seguir a liña que levamos nestas últimas 2 semanas".

De conseguir o triunfo, que sería o terceiro consecutivo, o defensor branquiazul advirte que "é moi complicado en Segunda conseguilo. Este pode ser o momento. É un tramo no que hai que sacar puntos. Pode ser hora de conseguir esa vitoria".

Iso si, reitera que a Segunda División "é moi longa. Pode haber empates ou algún partido como o do CD Lugo aquí que non entra a pelota. Pero hai que estar tranquilo. Parece que collemos esa chispa, demos un paso adiante e este é o camiño. Oxalá podamos conseguir unas cantas vitorias consecutivas. Hai que pensar primeiro no partido do sábado, que é o que vén. E logo xa se verá".

Non ten présa David Simón por estar nas prazas de ascenso directo: "Estamos ben situados. Sempre hai que estar aí e no momento xusto dar ese paso para conseguir o obxectivo de estar nos postos de ascenso directo".

Máis novas de: DAVID SIMÓN