Koke Vegas pasou este mediodía pola sala de prensa, nada máis chegar a Abegondo a expedición deportivista procedente de Madrid.
O meta deportivista, que debutou onte en Illueca en partido oficial coa camiseta branquiazul, confesou que "persoalmente foi un día importante polo meu debut e porque se conseguiron os 2 obxectivos do partido de onte. Un era gañar, tiñamos a obrigación de pasar de eliminatoria. E o segundo é coller confianza. A nivel individual a portería a 0 dáme confianza a min e logo ao equipo pola vitoria".
Advirte que o partido ante o CF Illueca, de Terceira División, "non era un partido fácil. A Copa do Rei é sufrimento e máis con este novo formato de competición. Todos os partidos de Copa son finais. O equipo onte soubo sufrir e soubo gañar. É algo moi positivo e oxalá que esta vitoria axude á confianza do equipo e a que se poida reverter a situación".
Lembra "vivir persoalmente situacións de dinámicas moi negativas co Levante. E unha vitoria sempre nos deu ese punto de inflexión. Oxalá que aquí suceda o mesmo".
A nivel persoal, Koke apunta sobre todos estes meses sen entrar no equipo que "o xogador é egoísta, quere xogar. Non é o máis fácil do mundo. Pero eu estou aquí traballando cada día coa miña máxima profesionalidade para poñela ao servizo do equipo. Atópome ben, preparado. Vin ao Dépor para parar todo o que chegue. Onte conseguiuse".
De cara ao choque ante o CD Tenerife deste venres 20 de decembro en ABANCA-RIAZOR (21:00 horas, Gol), Koke pide quedar con "a actitude do equipo. Estou totalmente convencido de que a situación é 100 % revertible. Hai calidade dabondo para sacar esta situación. Creo que o que o equipo necesitaba era unha vitoria, necesitaba ese punto de confianza, necesitaba sentirse máis a gusto. Oxalá que iso sirva para o venres. O foco témolo no venres xa, no Tenerife".
