RCDeportivo RCDeportivo RCDeportivo
Skip to main content
GL
PORTADA

Juergen Elitim, na súa presentación: "Imos aspirar ao máximo"

Juergen Farid Elitim Sepúlveda (Cartaxena de Indias, Colombia, 13 de xullo de 1999) foi presentado esta mañá como novo xogador do RC Deportivo para esta temporada cedido polo Watford FC.

Após posar para os medios gráficos coa súa nova camiseta e acompañado polo Presidente do Club, Antonio Couceiro, o novo atacante deportivista atendeu aos medios de comunicación.

Afirmou sentirse "bastante ben" despois de levar varias semanas de adestramento e superar "o problema do COVID": "Nos amigables ben, tentando coller ritmo, coller sensacións. Indo aos poucos".

Confesou que onte foi a primeira vez que pisou ABANCA-RIAZOR, con motivo do adestramento disposto por Borja Jiménez previo á LXXVI edición do Trofeo Teresa Herrera. "Bastante encantado. É un estadio precioso. Esperamos facer grandes cousas", apunta.

A pesar de que é novo no Club, é consciente "do que supón #ANOSAFORZA no Deportivo. Estamos a desexar que nos poidan acompañar durante a temporada, que sexan os máximos posibles; e gozar deles e de ABANCA-RIAZOR".

Recoñece que ao céspede artificial, superficie na que se xogou o partido amigable do pasado mércores no campo das Eiroas de Carballo, "estamos desacostumbrados, pero son circunstancias que se van a dar ao longo do ano e ás cales nos temos que adaptar tamén".

Finalmente, Juergen Elitim non teme á presión: "Presión son outro tipo de cousas. No fútbol forma parte disto. A min particularmente gústame, agrádame. Estou nunha institución bastante grande, somos o equipo máis grande da categoría. Imos aspirar ao máximo".

Cualifica o grupo no que quedou encadrado o Deportivo en 1ª RFEF como "bastante complicado" e destaca entre os favoritos por exemplo ao CD Badajoz, "que estivo a piques de ascender a pasada campaña. Vai ser difícil pero nós estamos aquí para traballar, tentar achegar e conseguir o obxectivo".