Lucas Pérez compareceu esta mañá na sala de prensa de Abegondo, unha vez finalizado o adestramento.
O dianteiro coruñés, autor onte do único tanto do Deportivo no partido ante a UD Las Palmas, apunta que "dentro, no vestiario, temos a sensación de que somos un bo equipo. Considerámonos un bo grupo ademais, levámonos todos ben. A sensación que temos é que podemos dar máis, e o que queremos é darlle a confianza ao adestrador novo, saber o que el quere do equipo e plasmalo no campo".
Pediu tranquilidade: "O partido de onte son detalles. Se no minuto 3 ou 4 o balón que pega Schär no pau entra cambia o partido, é outra cousa diferente. A expulsión tamén nos mata. E aínda así o equipo reacciona na segunda parte. Temos 25, 30 minutos onde puidemos facer dano a Las Palmas e puidemos case empatar o partido nesas dúas accións".
Cre que "as ilusións seguen intactas. A xente está moi ilusionada co proxecto. Vemos os compañeiros que temos ao redor, vemos a xente que traballa no Club. Vemos que estamos a crecer ano a ano e querémolo demostrar no campo. É o sentimento que nós temos".
Ten claro Lucas que "isto non se vai a arranxar poñéndonos nerviosos, querendo arranxar as cousas nun momento. O que hai que facer é traballar. Hai que levantar a cabeza. O fútbol é de cambiar rápido. Temos outra oportunidade o luns e pode cambiar cun bo resultado, unha boa imaxe nas Palmas, traendo os tres puntos para casa".
Insiste en que as cousas se poden cambiar "con positividade. Nada de ser negativos. Todo o vestiario que está no Deportivo viviu peores momentos, bos momentos. Tanto os veteranos como a xente nova temos que dar un paso á fronte, somos un equipo. Aquí non gaña o adestrador nin un xogador. Aquí gañamos todos e perdemos todos".
O xogador deportivista insiste en que "o que queremos é que canto antes o adestrador déanos as pautas do que nos pide e adaptarnos canto antes mellor para despois saber o que queremos co equipo, o que imos facer. E iso faise con traballo, no día a día".
Preguntado pola acción de Juanfran, Lucas restoulle importancia: "Aprender dos erros e que non volva suceder".
