Luis César manifestou este mediodía na sala de prensa de Abegondo que "temos bos futbolistas pero non somos un bo equipo. Non o estamos facendo ben. Como non somos un bo equipo fai peor aos futbolistas. Os futbolistas senten mal e aparece a debilidade psicolóxica. Aparece o exceso de responsabilidade. Ninguén pode traballar con exceso de responsabilidade, nin vós no voso ámbito laboral. Con exceso de tensión é incómodo traballar. Nós estamos a traballar con ese exceso de responsabilidade. É unha cadea, é unha sucesión de situacións nas que temos que dar resposta. Como a vida mesma. Van sucedendo cousas, atravesamos malas etapas a moitos niveis e temos que ir superándoas, liquidándoas. Non nos podemos quedar cruzados de brazos".
O técnico deportivista pide centrarse en "ser menos débiles e vulnerables para a través diso chegue esa vitoria que tanto estamos a desexar". Quere un equipo "con mentalidade gañadora. Para iso un bo traballo, reducir a vulnerabilidade futbolística que temos. Ímonos a sentir mellor nun campo e chegará o que todos desexamos, puntos e ir metendo a equipos detrás de nós".
Recalca que o equipo "chega en boas condicións para afrontar o partido da mellor maneira posible"; e enumera algúns dos defectos que lle están pasando factura o Dépor neste arranque ligueiro: "Cando estás a atacar cometemos erros nas alturas das liñas, futbolistas que non van participar na xogada non están ben colocados, á hora de mover o balón non o movemos como a min me gustaría, defensivamente máis axustado, balón parado. Hai un cúmulo de circunstancias que non facemos ben. Por iso mostramos vulnerabilidade. Temos que traballar niso e na debilidade mental que teñen os futbolistas pola clasificación que ocupan", engade.
En Santander mañá sábado ante o Real Racing Club (18:00, Movistar LaLiga 1), vaticina dous ou tres cambios no once respecto ao do pasado domingo en ABANCA-RIAZOR ante o Málaga CF. E do conxunto cántabro, recentemente ascendido a LaLiga SmartBank, advirte Luis César que "non debemos mirar a ninguén por encima do ombreiro, e máis na situación na que estamos. O Racing é un bo equipo, ten futbolistas expertos que xogaron en categorías importantes. É un equipo moi dinámico coa pelota, valente, atrevido e por momentos somete aos rivais co balón".
Subliña que a presenza de 400 deportivistas nas bancadas do Sardinero, "motívanos moitísimo. Aínda que non fose ninguén estabamos obrigados a loitar e facer todo o posible por gañar. Pero é unha responsabilidade máis que haxa xente alí que se gaste o seu diñeiro, que invista as súas horas para desprazarse e ver ao seu equipo. Queremos traer os puntos para todo o deportivismo e para que os nosos afeccionados volvan de Santander cunha alegría, que xa nos toca a todos. Son moitas semanas de sufrimento e de dor".