RCD / NOVAS

O Extremadura leva os 3 puntos de ABANCA-RIAZOR (1-2)

21/04/2019 18:17

O Deportivo sufriu un novo tropezón, nesta ocasión ante o Extremadura, nun partido que se puxo costa arriba após converter en gol o equipo visitante a súa primeira oportunidade e que acabou de complicarse nunha acción de verdadeira mala sorte. A reacción coruñesa, co tanto de Christian Santos preto do minuto 90, chegou demasiado tarde.

José Luis Martí, preparador branquiazul, fixo tres cambios con respecto ao once que presentou no seu debut, a pasada xornada ante o Osasuna. En mediocampo, Didier Moreno e Vítor Silva substituíron a Álex Bergantiños e Pedro Mosquera. En ataque, Borja Valle entrou en lugar de Christian Santos.

Comezou dominando o Deportivo, aínda que no primeiro cuarto de hora o único achegamento perigoso por parte de calquera de ambos os equipos foi unha chegada de Quique nun balón en profundidade. O goleador branquiazul quixo cruzarse por diante de Borja Granero para provocar o penalti, pero a pesar de existir contacto o colexiado non castigou a acción.

O primeiro achegamento do conxunto estremeño produciuse nun lonxano libre directo que botou Kike Márquez, no minuto 18. O disparo por alto, cara a un Dani Giménez cegado polo sol, que preferiu non complicarse a vida e palmear por encima do traveseiro para despexar a saque de esquina.

Con todo, cinco minutos despois, na súa primeira ocasión en xogo, o equipo de Almendralexo adiantouse no marcador. Foi nun centro a perna cambiada desde a esquerda, saído dos pés de Bastos, que Olabe rematou coa dereita, entrando como unha exhalación no segundo pau, adiantándose á retagarda deportivista.

No minuto 28, o árbitro, a instancias do seu asistente, anulou un gol a Borja Valle por previo fóra de xogo de Pedro. Na repetición televisiva puido apreciarse que o centrocampista alacantino atopábase en liña co último defensor visitante cando o coiro saía da bota dereita de Edu Expósito.

Cando se cumpría a media hora, de novo Pedro foi protagonista. Recibiu no extremo dereito após unha incursión de Borja Valle e disparou con forza. Pardo, que chegaba ao cruzamento, desviou a pelota e esta case entra na súa propia meta. O balón estrelouse no lateral esquerdo da rede da meta estremeña.

Dous minutos despois, un Dépor vindo arriba gozou doutra clara ocasión. Borja Valle quedou man a man con Casto, após un gran servizo en profundidade de Edu Expósito. O berciano tratou de picar sobre o meta azulgrana, pero este adiviñoulle a intención e desbaratou a oportunidade.

Coa vitoria pola mínima da formación dirixida polo ex deportivista Manuel Mosquera chegouse ao descanso. Tralo mesmo produciuse a primeira substitución nas filas deportivistas. José Luis Martí deu entrada a Christian Santos en lugar de Vítor Silva.

Arrancou con novos bríos o Dépor, amo e señor da pelota e do partido desde o asubío inicial do tempo complementario. Aos 5 minutos produciu a súa primeira ocasión con finalización, despois de varias chegadas con perigo pero sen disparo final. Foi após unha acción de Edu Expósito na medular. O barcelonés abriu cara ao extremo esquerdo para Borja Valle, que serviu ao corazón da área para o remate de Quique. O valisoletano, forzado, disparou desviado á dereita do marco visitante.

O poste impediu o empate no minuto 56. Borja Valle recuperou unha pelota ao bordo da área, lanzou polo extremo esquerdo a Pedro e este sacou un servizo raso e forte ao segundo pau, onde chegaba Didier Moreno. Bastos, no seu intento desesperado de despexe, estrelou o balón na madeira, de onde saíu repelido lonxe da portería estremeña.

O Dépor non aproveitou a súa e pouco despois, no minuto 58, o Extremadura ampliou distancias. Kike Márquez estrelou un libre directo na barreira, o rebote caeu a pés de Pardo e este sacou un durísimo disparo, aínda que centrado, que se lle coou a Dani Giménez entre as pernas.

O xerro de auga fría non descompuxo ao Dépor, que con celeridade retomou o camiño cara a portería azulgrana, pero topouse unha e outra vez con Casto. Nos seguintes 5 minutos, o porteiro do Extremadura sacou dúas mans imposibles, a primeira nunha cabezada de Christian Santos a centro de Pedro e a segunda nun dereitazo raso de Borja Valle.

A 10 minutos da conclusión, Quique cazou un rexeite á saída dun córner, cunha volea tan próxima á portería ante a que a Casto foille imposible responder. Con todo, o esférico estrelouse nas pernas de Fausto Tienza.

No minuto 89, o Deportivo recortou distancias, ao aproveitar Christian Santos o rexeite de Casto, que non puido atrapar a pelota após un potente zurdazo de Pedro Mosquera desde o bordo da área.

Pouco despois, Diego Caballo conectou con Borja Valle preto da liña de fondo. O dianteiro tentou sorprender a Casto polo primeiro pau, pero un defensa rozou a pelota, esta elevouse e, aínda que estivo moi preto de superar ao gardameta nunha sorte de vaselina, o porteiro atrapou a pelota.

Con esta nova derrota, o Deportivo continúa con 54 puntos, a 4 da sexta praza.

RC Deportivo: Dani Giménez, Bóveda (Fede Cartabia, min. 62), Domingos Duarte, Pablo Marí, Diego Caballo, Pedro, Didier Moreno (Pedro Mosquera, min. 69), Vítor Silva (Christian Santos, min. 46), Edu Expósito, Borja Valle e Quique.

Estremadura UD: Casto, Álex Díez, Pardo, Borja Granero, Bastos, Olabe (Nando, min. 65), Gio Zarfino, Lolo, Perea (Fausto Tienza, min. 72), Kike Márquez e Ortuño (Willy, min. 84).

Goles: 0-1 Olabe (min. 23); 0-2 Pardo (min. 58); 1-2 Christian Santos (min. 89).

Árbitro: López Toca (c. cántabro). Cartón amarelo a Pablo Marí (min. 37), Vítor Silva (min. 39), Didier Moreno (min. 44), Olabe (min. 47), Casto (min. 52) e Gio Zarfino (min. 71).

Incidencias: partido correspondente á 35ª xornada de LaLiga 1|2|3 no Estadio ABANCA-RIAZOR ante 16.649 espectadores. No descanso, o CRAT recicibió a homenaxe do Deportivismo pola recente consecución do título de Liga Iberdrola Feminina.

RCD / J35 LaLiga SmartBank

Suplentes

Suplentes

Estadio

Estadio ABANCA-RIAZOR (16.659 espectadores)

Goles

  • 0-1 (23'). Olabe
  • 0-2 (58'). Pardo
  • 1-2 (89'). Christian Santos

Árbitro

José Antonio López Toca..

RCD / Vídeo

RCD / Vídeo

RCD / Vídeo

Valora a #osnosos no #DéporExtremadura

#ANOSAFORZA
7,0
EQUIPO ARBITRAL
4,9
CHRISTIAN SANTOS
4,3
PEDRO MOSQUERA
4,3
EDU EXPÓSITO
4,2
FEDE CARTABIA
3,8
BORJA VALE
3,8
QUIQUE GONZÁLEZ
3,8
DANI GIMÉNEZ
3,6
PABLO MARÍ
3,4
DOMINGOS DUARTE
3,3
DIEGO CABALLO
3,1
DIDIER MORENO
2,8
ENEKO BÓVEDA
2,7
EQUIPO TÉCNICO
2,7
VÍTOR SILVA
2,6
PEDRO SÁNCHEZ
2,6
O periodo de votación finalizou o 25-04-2019 17:21.