RCD / NOVAS

O vestiario branquiazul resalta a efectividade do equipo nas dúas áreas

10/11/2018 23:32

Dous dos goleadores do Deportivo esta noite, Quique González e Carlos Fernández, atenderon aos medios de comunicación na zona mixta de ABANCA-RIAZOR.

O dianteiro valisoletano, pichichi da categoría con 9 goles, destacou que durante o partido "as ocasións que tivemos marcámolas. Trátase de ser eficaz na área contraria e na túa área".

Cre Quique que "hai veces que tes 6 ocasións e metes todas; e outras 6 e non marcas ningunha. O fútbol é así. Hoxe tocounos ser efectivos e diso trátase. Ser efectivos nas áreas que é o que che dá ao final os puntos".

Preguntado pola ovación coa que lle despediu a afección ao ser substituído, indicou que "me enche de orgullo. Seguirei traballando igual ou mellor para axudar ao equipo. Que sexan moitas vitorias e que a xente goce de nós".

Ademais confesou estar "moi feliz" por Carlos Fernández, o seu compañeiro no ataque: "Está a tocarnos xogar a Carlos e a min arriba. Alégrome moito por el. Pero aquí non se trata de Carlos nin Quique. Somos moitos xogadores, hai moita xente que está fóra e que día a día aperta como o que máis".

Pola súa banda, Carlos Fernández, que o luns se incorpora á concentración da Selección Española sub-21, dixo estar "contento sobre todo pola vitoria, porque foi un partido complicado, foi un partido difícil ante un rival moi duro".

Recoñeceu que "non foi un bo día con balón e tiñamos que aproveitar un pouco máis os espazos, ser máis verticais. E aí estivemos acertados".

O dianteiro sevillano opinou que "cando xogabamos ao espazo, corriamos, eles sufrían. Aproveitámolo. Soubemos potenciar esa debilidade que tiñan eles. Polo que se puido ver no xogo puido ser o marcador un pouco avultado, pero creo que foi xusto".

Máis novas de: QUIQUE GONZÁLEZ, CARLOS FERNÁNDEZ