Pepe Mel, técnico deportivista, asegurou esta mañá na sala de prensa de Abegondo que "sabemos o que nos espera ante o Espanyol", mañá domingo 24 de setembro ás 12:00 horas (Bein LaLiga) no RCDE Stadium.
Explica que o rival, o conxunto espanyolista, "está moi xunto, co 4-4-2, con nada de espazo entre liñas, con saída de velocidade rápidas. Temos que ser moi fortes nas vixilancias e nas transicións. O Celta perdeu en dous balóns que non soubo administrar no centro do campo. A velocidade de Piatti, de Leo Baptistao, de Gerard mátate".
Advirte Pepe Mel que haberá algún cambio no once inicial respecto ao do pasado mércores no Estadio ABANCA-RIAZOR ante o Alavés: "Tivemos tres partidos. Pensamos en todas as posibilidades, xente que estea máis tocada, xente que tivese algún problemilla. Algún cambio seguro que haberá".
A xuízo do adestrador branquiazul, e despois da primeira vitoria ligueira, "é máis fácil facer as cousas a través do resultado positivo. O xogador recobra a confianza no que está a facer".
Lembra que ante o Alavés "empezamos con titubeos, algo que era normal porque viñamos de non gañar. Aos poucos fomos mellorando e creo que fixemos unha moi boa segunda parte cun final da primeira tamén bo. Ao final fomos mellores que o Alavés. Tivemos que gañar cun resultado máis cómodo pero ao final gañamos. Iso dáche confianza. Os futbolistas ven que son capaces. Estou seguro que o único que pode suceder é mellorar".
A pesar de estar o equipo en descenso, Pepe Mel pide "deixala (a clasificación) de momento. Está claro que se na xornada 5, de 15 puntos ti fixeches 4, é normal que moi arriba non esteas. O que temos que tentar é que nos seguintes 5 partidos, no canto de 4 puntos fagamos moitos máis. Non hai máis voltas que esa".
