RCD / NOVAS

Punto agridoce para o Dépor ante o líder (1-1)

07/10/2018 20:47

O Deportivo empatou no Estadio ABANCA-RIAZOR ante o líder, un Málaga que se adiantou no marcador nunha acción afortunada despois de que o conxunto coruñés gozase das mellores e máis claras ocasións até entón. Aínda por riba, xusto despois de que os branquiazuis lograsen o empate, o colexiado expulsou inxustamente a Quique.

Natxo González, preparador branquiazul, realizou dous cambios con respecto ao once que presentou na pasada xornada, en Tarragona, ambos no mediocampo. Pedro Mosquera deixou a súa posición a Álex Bergantiños mentres que Michael Krohn-Dehli substituíu ao lesionado Vicente Gómez.

No minuto 3 produciuse o primeiro disparo a portería. Fíxoo o Málaga, por medio de Adrián. Dani Giménez atallou con seguridade.

Se o primeiro achegamento malaguista foi claro, aínda o foi máis a primeira chegada coruñesa. Só uns segundos despois, Quique remataba fóra, desde o bordo da área pequena, un pase da morte de David Simón, que gañara a liña de fondo após desbordar a Ricca.

Recentemente superado o minuto 10, Carles Gil gozou dunha clara oportunidade, nun contragolpe no que Quique e o valenciano quedaron en 2 contra 1 fronte a Luis Hernández. O mediapunta recortou cara ao seu perfil bo, buscando un disparo á base do poste contrario. O balón rozou no defensa malaguista e foise pola liña de fondo, aínda que o colexiado non sinalou saque de esquina.

Despois dun tramo central de dominio deportivista, de longas posesións, cun Málaga pechado ao redor da súa área, e sen disparos a portería, Pablo Marí tivo nas súas botas o primeiro gol do partido. Corría o minuto 37 cando o Dépor botou un córner en curto. Krohn-Dehli meteu o balón na área por baixo, após pasearse por diante de toda unha fila de defensas e posibles rematadores. O coiro quedou botando ao central valenciano, que a pesar da posición vantaxosa bateu por riba do traveseiro da portería de Munir.

Xa no tramo final do primeiro período, Quique cabeceou un bo centro de Saúl desde o extremo esquerdo. A pelota escapouse moi preto de poste dereito do marco visitante. O cronómetro sinalaba o minuto 41.

Co empate sen goles chegouse ao descanso. Ao regreso do mesmo produciuse a primeira substitución nas filas do Málaga. Juanpi quedou na caseta e no seu lugar saíu Pacheco.

O conxunto visitante adiantouse no marcador aos dez minutos da segunda parte, nunha xogada marca da casa, nun saque de banda no que Luis Hernández meteu o balón na área e despois de varios rexeites e rebotes N'Diaye enviouno ao fondo das mallas.

Tralo tanto visitante, Natxo González fortaleceu a liña de ataque dando entrada a Christian Santos por Carles Gil. Carlos Fernández atrasou uns metros a súa posición e o venezolano acompañou en punta a Quique.

A un cuarto de hora do final, o Dépor logrou o tanto do empate, tamén nunha segunda xogada dunha acción a balón parado. Krohn-Dehli recolleu o rexeite, abriu para Saúl e este atopou a Álex Bergantiños, na parte esquerda da área. O capitán deportivista meteu un balón tenso á área pequena, onde o desviou o xusto Carlos Fernández para superar a Munir.

Co Dépor resucitado e buscando a vitoria, o colexiado expulsou inxustamente con vermella directa a Quique, nunha acción totalmente fortuíta, sen ningunha intención. O dianteiro valisoletano tentou rematar de chilena un centro de David Simón, pero a súa bota esquerda impactou en Luis Hernández, que despexou o esférico de cabeza. Corría o minuto 78.

Pouco despois, Dani Giménez evitou o tanto do Málaga, saíndo aos pés de Harper, que se plantou só ante o porteiro deportivista após recortar a varios defensas herculinos.

Nos minutos finais, o Málaga non foi capaz de acosar a portería coruñesa máis que con pelotazos. O Dépor si dispuxo de dúas boas opcións, nunha falta lateral e nun saque de esquina, ambos os dous desbaratados por rexeites da zaga andaluza.

Co empate, o Deportivo mantense na quinta praza da clasificación de LaLiga 1|2|3, con 15 puntos despois de 8 xornadas, a 4 do líder da competición, precisamente o rival de hoxe.

RC Deportivo: Dani Giménez, David Simón, Domingos Duarte, Pablo Marí, Saúl, Didier Moreno (Edu Expósito, min. 71), Álex Bergantiños, Krohn-Dehli, Carles Gil (Christian Santos, min. 63), Carlos Fernández (Bóveda, min. 90) e Quique.

Málaga CF: Munir, Iván Rodríguez, Luis Hernández, Pau, Ricca, Juanpi (Pacheco, min. 46), N'Diaye, Adrián, Ontiveros (Hicham, min. 72), Harper (Héctor Hernández, min. 87) e Blanco Leschuk.

Goles: 0-1 N'Diaye (min. 54); 1-1 Carlos Fernández (min. 76).

Árbitro: Díaz de Mera (c. castelán-manchego). Expulsou con vermella directa a Quique (min. 78). Cartón amarelo a Juanpi (min. 29), Harper (min. 40), Ontiveros (min. 69), Iván Rodríguez (min. 72) e Adrián (min. 80).

Incidencias: partido correspondente á 8ª xornada de LaLiga 1|2|3 no Estadio ABANCA-RIAZOR ante 18.362 espectadores.

RCD / J8 LaLiga 1|2|3

  • Dani Giménez
  • David Simón
  • Saúl
  • Pablo Marí
  • Domingos Duarte
  • Krohn-Dehli
  • Carles Gil (64')
  • Didier Moreno (71')
  • Álex Bergantiños
  • Carlos Fdez (90')
  • Quique

Suplentes

  • Diego Caballo
  • Pedro Sánchez
  • Adrián Ortolá
  • Christian Santos (64')
  • Edu Expósito (71')
  • Eneko Bóveda (90')
  • Pedro Mosquera
  • Munir
  • Luis H.
  • Iván Rodríguez
  • Pau
  • F. Ricca
  • J. Ontiveros (72')
  • Juanpi (46')
  • N'Diaye
  • Adrián
  • Blanco Leschuk
  • Harper (87')

Suplentes

  • Hicham (72')
  • Lacen
  • Héctor Hdez. (87')
  • David Lombán
  • Diego Glez
  • Kieszek
  • Pacheco (46')

Estadio

Estadio ABANCA-RIAZOR (18.374 espectadores)

Goles

  • 0-1 (54'). N'Diaye
  • 1-1 (76'). Carlos Fdez

Árbitro

Isidro Díaz de Mera Escuderos amoestou aChristian Santos (78') do RC Deportivo y Juanpi (29'), Harper (40'), J. Ontiveros (69'), Iván Rodríguez (73'), Adrián (80') do Málaga CF. Expulsou con vermella directa a Quique (78') do RC Deportivo .

RCD / Vídeo

RCD / Vídeo

RCD / Vídeo

Valora a #osnosos no #DéporMálaga

#ANOSAFORZA
8,2
CARLOS FERNÁNDEZ
7,4
ÁLEX BERGANTIÑOS
6,9
QUIQUE GONZÁLEZ
6,8
DANI GIMÉNEZ
6,6
SAÚL
6,5
DOMINGOS DUARTE
6,5
DAVID SIMÓN
6,4
PABLO MARÍ
6,3
CARLES GIL
6,3
EDU EXPÓSITO
5,9
EQUIPO TÉCNICO
5,8
CHRISTIAN SANTOS
5,5
KROHN-DEHLI
5,0
ENEKO BÓVEDA
4,2
DIDIER MORENO
3,8
EQUIPO ARBITRAL
2,0
O periodo de votación finalizou o 11-10-2018 18:48.