Víctor: O Dépor é de Primeira e ten que seguir sendo de Primeira

O técnico deportivista insiste en que "o sete últimos clasificados temos moitísimas dificultades para gañar, sen excepción. Non logramos gañar partidos porque se non,non estariamos entre o sete últimos, estariamos entre o sete primeiros. O Dépor non está á marxe deste grupo de sete equipos. Pero temos capacidade, temos vontade. Estamos a ofrecer fútbol suficiente para alcanzar bos resultados. Mañá si que é un partido moi importante, dunha transcendencia decisiva, sobre todo no aspecto anímico para romper este refacho da que vimos".

Iso si, matiza que non é un partido "definitivo. Se conseguimos a vitoria non imos alcanzar xa o obxectivo da salvación. Porque somos un dese sete equipos aos que é moi difícil gañar partidos. Pero si que sería un momento moi oportuno para conseguir a vitoria".

Pola súa banda, José Rodríguez compareceu tamén ante os medios informativos tras confirmarse onte a súa convocatoria pola Selección Española Sub-21. "Moi contento porque era unha das cousas que quería facer", manifestou o centrocampista branquiazul.

Habitual nas convocatorias das categorías inferiores da selección, conta que a súa última experiencia como internacional foi no Campionato de Europa Sub-19, no que ademais foi o capitán. "Era unha das cousas que máis ilusión me facía este ano. Onte fíxome moitísima ilusión", confesa.

Agora ben, asegura ter a cabeza centrada no partido de mañá domingo (12.00 horas) en Riazor: "A miña cabeza só pensa no Espanyol. O primeiro é o partido de mañá, que é súper importante".