O RC Deportivo e a Universidade da Coruña (UDC) organizan a próxima fin de semana o curso de formación específica de posgrao sobre "Avances en prevención e readaptación de lesións e innovación en recuperación da fatiga"
O venres 7 e o sábado 8 de xuño, en sesións intensivas presenciais de mañá e de tarde nas instalacións do INEF, terá lugar esta actividade, na que impartirán docencia varios expertos internacionais en prevención e readaptación de lesións e en recuperación de fatiga.
Sobre a primeira das especialidades disertará Carlos Lalín, pioneiro na readaptación co RC Deportivo entre 1999 e 2009, que a partir de entón traballou nalgúns dos equipos máis importantes do planeta, como Real Madrid, Chelsea ou Manchester United.
O segundo asunto será tratado por Nicolás Terrados, asesor biomédico do COE para os Xogos Olímpicos de 1992 e profesor da Universidade de Oviedo; e Julio Calleja, técnico superior de atletismo, baloncesto e natación e adestrador persoal de xogadores da NBA.
Deste xeito, o Deportivo e a UDC seguen proporcionando aos adestradores galegos a posibilidade de acceder a todos os avances e innovacións nas diferentes materias do adestramento en fútbol e en deportes de equipo.
