60 clubs de elite crean unha páxina privada para facer fichaxes por Internet
O País publica:O bazar virtual no que se converteu Internet, onde se poden comprar e vender desde uns calcetíns a unha obra de arte pasando por un ril ou unha película porno, ofrecerá a partir de maio un novo produto: futbolistas. Todo é obra de InterClub
Segundo o máximo responsable de InterClub, Nick Roach, este mercado virtual de xogadores non estará aberto ao público, e contará coas debidas medidas de seguridade para que só sexa accesible para "clubs de fútbol e organismos oficiais". Roach recorre a un exemplo para explicar os beneficios deste novo sistema. "Un equipo brasileiro pode necesitar porse en contacto co Manchester. Deste xeito poderá enviar a súa mensaxe directamente ao máximo responsable do club. Mesmo se o fai en portugués, o texto será traducido inmediatamente ao inglés".
Ningún paso dos habituais no traspaso dun futbolista queda fóra de InterClubNet. Ademais dun comunicador privado ao que só terán acceso os presidentes, directores e adestradores dos clubs abonados e que traducirá as mensaxes a seis idiomas diferentes: inglés, francés, alemán, castelán, portugués e italiano, o portal contará coa maior base de datos de futbolistas do mundo: preto de 20.000 xogadores de dous mil equipos. Haberá ademais unha lista de transferibles con toda a información que cada club pida sobre os xogadores que lle interesen e un taboleiro de anuncios onde os equipos poderán porse en contacto para ofrecer amigables ou alianzas comerciais.
O Deportivo é o único equipo español dunha longa lista de clubs de todo o mundo -Manchester, Chelsea, Milán, Inter, Benfica, Mónaco e Flamengo, entre outros- que xa se adheriron ao proxecto.