Álvaro Rey incorporouse esta mañá ao traballo de grupo na primeira sesión de traballo do Dépor de cara á próxima cita ligueira, o sábado 21 de maio ás 18:30 (Footters e Fuchs-Sports), en horario unificado, ante o Real Valladolid Promesas no Anexo ao Estadio José Zorrilla. Será a 37ª xornada, penúltima, na liga.
O atacante andaluz completou con normalidade todas as tarefas pero os Servizos Médicos branquiazuis agardarán á súa evolución nos próximos días para comprobar se está en condicións de competir a fin de semana en Valladolid.
A xornada arrancou como é habitual após cada día de descanso na sala de vídeo. Borja Jiménez insiste nos aspectos que o equipo ten que mellorar despois de cada partido.
Xa sobre o céspede, o corpo técnico dispuxo un quecemento, un exercicio de posición con porterías pequenas, un partido a tres cuartas partes de campo e fútbol reducido, de alta intensidade, para concluír.
Víctor tivo traballo individualizado mentres que Trilli estivo de permiso hoxe martes. Así pois, Noel, Yeremay, Alberto e Iván Guerrero foron a representación de #ANOSACANTEIRA.
Mañá mércores 18 de maio o Dépor repetirá sesión a partir das 10:30 na Cidade Deportiva.
