ANOSACANTEIRA suma un novo internacional, Gael Seijo Rigueira (Taboada, Lugo, 29 de xullo de 2012).
O central ou mediocentro do Infantil foi convocado por primeira vez pola selección española sub-14 para unha concentración que terá lugar na localidade alacantina de Alfaz del Pi do luns 2 ao venres 6 de marzo.
Desta maneira, o futbolista lucense únese a unha longa lista de canteiráns branquiazuis xa internacionais como Yeremay, David Mella, Dani Barcia, Antón Vilariño, Mauro Valeiro, Raúl Lema ou Nico Balbas.
Na que vai de temporada, Gael Seijo, que chegou a ANOSACANTEIRA no seu primeiro ano de infantil, xogou 19 partidos, 15 deles como titular, e anotou 11 goles.
-Foto@rfef.es
Mauro Valeiro, campión do Torneo do Algarve coa selección española sub-17
Gael Seijo colle a substitución de Mauro Valeiro, que se proclamou a pasada semana coa selección española sub-17 campión do Torneo Internacional do Algarve (Portugal).
Os rivais do combinado nacional foron Portugal, Alemaña e Finlandia.
No primeiro encontro ante Portugal o venres 13, o canteirán deportivista seguiu desde o banco un partido que finalizou con igualada (1-1).
Ante Alemaña o domingo 15 de febreiro, Mauro Valeiro foi titular no triunfo español por 3-2. O deportivista foi substituído no minuto 75 por Eloi Gómez.
A selección española sub-17 concluíu o mércores 18 o Torneo do Algarve co choque ante Finlandia.
O futbolista branquiazul saltou ao céspede no minuto 57 en substitución de Roberto Tomás nun encontro que acabou en goleada española por 0-6 e título do torneo.
Os resultados de Mauro Valeiro foron os seguintes:
Venres 13 de febreiro
PORTUGAL 1 - ESPAÑA 1
Domingo 15 de febreiro
ESPAÑA 3 - ALEMAÑA 2
Mércores 18 de febreiro
FINLANDIA 0 - ESPAÑA 6
O centrocampista coruñés, que chegou a ANOSACANTEIRA no primeiro ano de benxamíns na temporada 2017-18, xa sabe o que é ir citado pola selección española sub-15 e sub-16.
Mauro Valeiro suma a día de hoxe 18 partidos co Xuvenil A na División de Honra, 14 deles como titular; nos que anotou 2 goles.