O presidente do Real Club Deportivo, Antonio Couceiro, compareceu ante os medios de comunicación após a celebración da Xunta Xeral Extraordinaria da sociedade.
As primeiras cuestións foron referidas á situación económica que se presentou minutos antes aos accionistas: “un orzamento inicial de 6,3 millóns e un gasto de 6,6 en cadro é inviable, supoño que iso provocará cambios profundos de cara á próxima temporada e desde o punto de vista financeiro haberá que adoptar as decisións oportunas para que o balance do Deportivo teña a solvencia necesaria para poder afrontar o futuro. Evidentemente prodúcese un importante descuadre entre os ingresos e os gastos que terán que ser asumidos ou financiados polo principal accionista. É unha situación complexa, pero demostra que está a apostar a longo prazo tendo que asumir estas situacións intermedias, facer un esforzo financeiro necesario para lograr conseguir esa clasificación para o fútbol profesional e sentar as bases dun futuro sustentable para Club. O obxectivo é volver canto antes a Segunda División, é dicir, volver competir nunha división profesional por tanto agora temos que manternos na Primeira RFEF”.
Aínda que: “o único que lle preocupa agora mesmo é terminar ben a temporada” no caso de que se producise un descenso a Segunda RFEF “que non é imposible, non quero crelo, pero non é imposible, insisto en que o primeiro accionista trasladou que aposta decididamente polo Deportivo e por tanto, se hai que partir da Segunda, partiremos da Segunda, pero ese é un obxectivo que, como digo, nin é desexable e desde logo estou convencido de que non vai ser así”.
A partir de aí recoñeceu que “teremos que ter en conta que haberá unhas limitacións financeiras e con elas temos que preparar o mellor equipo co maior nivel para competir exitosamente na Primeira RFEF e lograr o ascenso a Segunda. O acceso ao fútbol profesional é un obxectivo irrenunciable, xa era o obxectivo deste ano”.
Coa temporada nin o obxectivo ao que agora aspira o equipo sen pechar, non quixo falar de nomes propios nin de ningunha medida inmediata: "é evidente que hai que facer cambios, hai que tratar de mellorar o cadro para conseguir ese obxectivo de forma inmediata, cousa que este ano desgraciadamente non se conseguiu, pero nestes momentos o que teño que dicir é que tanto nós como sobre todo os xogadores debemos estar centrados no obxectivo da permanencia en ata que termine esta temporada. Xa non falta moito e creo que non é momento de distraccións, aínda que creo que a todos nos consta o a gusto, que senten todos os xogadores no Deportivo polo trato do Club e o bo ambiente no vestiario, co corpo técnico, pero ao mesmo tempo o esforzo económico que se fixo esta temporada non se vai a poder manter a próxima, polo que se valorará cada caso en función de moitos parámetros, como pode ser a categoría, orzamento, contratos, expectativas persoais do xogador e o propio proxecto deportivo do Club. Vai haber que tomar decisións importantes e complexas e todo isto tocará empezar a facelo unha vez que terminen a temporada, agora nestes momentos toca gañar e gañar, non hai outra”.
O obxectivo agora mesmo é permanecer en Primeira RFEF, categoría sobre a que houbo unha reunión días atrás na Federación na que non estivo presente o Deportivo: “a relación coa Federación nestes momentos é magnífica. Convocáronnos á reunión que estou a comentar para informarnos de todo o relacionado coa Primeira División da Federación Española de Fútbol. Esa reunión á que terían que asistir un número moi importante de clubs, non se expuxo telemáticamente como se está facendo nestes momentos e suxerímoslles que o puidesen facer de forma telemática, pero a Real Federación española de fútbol entendeu que non, que debía de ser presencial. De todos os xeitos, comunicóusenos aos clubs que pediramos que a reunión fose telemática que era soamente de tipo informativo, é dicir, non se ía a tomar ningunha decisión e que, por tanto, non era necesaria nin obrigatoria na nosa presenza, porque todo o que alí se tratase íasenos a trasladar como así foi, polo que estamos perfectamente informados, directamente pola propia Federación do que se tratou nesa reunión”.
