Ryan Babel, apoiado na tradutora Melissa Santiso, desvelou esta mañá na sala de prensa de Abegondo que "a próxima semana está prevista unha reunión co club" para falar o tema da súa renovación. Neste sentido, o dianteiro deportivista asegura que a súa intención é seguir sendo xogador do Deportivo a partir do mes de decembro.
Subliña que "está moi ben ser apreciado neste equipo. A calquera xogador anímalle moitísimo saber que conta co apoio do club e dos seus compañeiros".
Sobre o partido do pasado luns ante a Real Sociedad, o internacional holandés dixo que "sabiamos que tiñamos que gañar. Precisamente todos estabamos preparados para este partido. Todos súper enfocados, e por fin logramos un bo resultado".
A nivel persoal, Babel comenta "estar satisfeito coa súa condición física pero agora é necesario coidar os pequenos detalles para estar como considero que debo estar".
